“Тошкент вилоятида мавжуд авария ҳолатидаги ва маънан эскирган кўп қаватли уйларни реновация қилиш орқали аҳоли яшаш шароитларини янада яхшилаш чора-тадбирлари тўғрисида”ги Вазирлар Маҳкамаси қарори лойиҳаси муҳокамага қўйилди.
Ҳужжат лойиҳасида келтирилишича, Тошкент вилоятида эскирган ёки яроқсиз кўп қаватли уй-жой фонди хатловдан ўтказилган ҳамда инструментал ўрганишлар натижасига кўра 23 та уй авария ҳолатида деб топилган, мазкур уй-жойларда яшовчи фуқаролар томонидан уй-жой шаротини яхшилаш учун янги уй-жой қуриб бериш тўғрисида кўплаб мурожаатлар келиб тушган.
Реновация қилиниши белгиланган массивларда кўп қаватли уй-жойларни қуриш — электрон онлайн аукцион савдоларида ғолиб бўлган тадбиркорлик субъектларининг ўз маблағлари, тижорат банкларининг кредитлари ва қонунчилик ҳужжатларида тақиқланмаган бошқа манбалар ҳисобидан амалга оширилади. Бунда кўп қаватли уй-жойлар лойиҳалари ҳудуддаги аҳоли даромадидан келиб чиққан ҳолда ишлаб чиқилиши лозим.
Тошкент вилояти ҳокимлиги ўн кун муддатга реновация қилиниши белгиланган уй-жойлар ўрнида Ўрта Чирчиқ, Бўстонлиқ туманларида қаватлар сони 5 тадан, Чирчиқ, Олмалиқ шаҳарлари, Қибрай туманида қаватлар сони 7 тадан кам бўлмаган замонавий уй-жой қуриш учун талабгорларни аниқлаш бўйича лойиҳаларни электрон тендер савдоларига чиқарилишини таъминлайди.
Бунда, кўп қаватли уй-жойлар бузилишидан чиқган яроқли қурилиш материаллари лойиҳа ташаббускорлари тасарруфида қолиши кўрсатиб ўтилади; Олмалиқ шаҳри бош плани ишлаб чиқилганини ҳисобга олган ҳолда кўп қаватли уй-жой “Янги Ўзбекистон” массивидан бош планга мувофиқ қурилиш инобатга олинади.
11 ой муддатда мулкдорларга квартира топширилгунга қадар уларга кўп қаватли уй-жой жойлашган туман (шаҳар) ҳокимиятининг маҳаллий бюджетнинг қўшимча манбалари ёки ташаббускор тадбиркорларнинг ўз маблағлари ҳисобидан молиялаштириш шарти билан вақтинчалик ижарага тураржой берилади. Қурилиш ишлари белгиланган муддатда фойдаланишга топширилмаган тақдирда ижара лойиҳа ташаббускори маблағи ҳисобидан қопланиши инобатга олинади.
Мулкдорларга ўринга-ўрин ажратишдан ортган квартиралар президентнинг “Ипотека кредити механизмларини такомиллаштиришга оид қўшимча чора-тадбирлар тўғрисида” фармони билан жорий этилган бозор тамойилларига асосланган ипотека кредитлари орқали аҳолини уй-жой билан таъминлашнинг янги тартиби доирасида белгиланган тартибда реализация қилинади, шу жумладан, ипотека кредити бўйича субсидия хабарномаси олган фуқароларга устувор тарзда.
Қурилишда энергия тежамкор материалларини кенг жорий этиш орқали уй-жой қурилиши вақти ва таннархини пасайтириш мақсадида:
- лойиҳа-смета ҳужжатларини экспертизадан ўтказиш жараёнида уларда энергиятежамкор қурилиш материаллари қўлланганлигига алоҳида эътибор қаратилади.
Эслатиб ўтамиз, 2021 йил май ойида президент раисилигида ўтказилган йиғилишда Ўзбекистонда 2021 йилда 2 минг 400 та, келгуси 2 йилда 4 минг 100 та кўп қаватли уйлар таъмирланиши маълум қилинганди.
Изоҳ (0)