АҚШ Украинага умумий қиймати 350 миллион долларлик янги ҳарбий ёрдам пакетини ажратди. Бу ҳақда давлат котиби Энтони Блинкенга таяниб, CNN хабар бермоқда.
Бу Киевга берилган Америка қуроллари ва ҳарбий техникасининг 34-пакети бўлади. Унинг таркибига ҲИМАРС ёппасига ўт очувчи реактив тизимлари учун ўқ-дорилар, Bradley пиёдалар жанговар машинаси учун ўқ-дорилар, ҲАРМ антирадар ракеталари, танкка қарши қуроллар, қайиқлар ва бошқа турдаги ўқ-дорилар, қуроллар ва жиҳозлар киради.
Вашингтон бундан аввалги 400 миллион долларлик ҳарбий пакет ҳақида 3 март куни эълон қилганди. Унга ҲИМАРС, гаубицалар ва Bradley пиёда аскарларининг жанговар машиналари учун ўқ-дорилар, шунингдек, кўприк қуриш мосламалари ва бошқа жиҳозлар киритилган. Бундан ташқари, ўша ёрдам ичида Киевга техник хизмат кўрсатиш, ҳарбийларни ўқитиш ва бошқалар бор эди.
24 февраль куни, Россиянинг Украинадаги босқини йиллиги муносабати билан Пентагон раҳбари Ллойд Остин сўнгги бир йил ичида Вашингтон Киевга хавфсизлик учун 32 миллиард доллар ёрдам берганини айтганди. Унинг сўзларига кўра, АҚШ томонидан Украинага берилган ёрдам 1600 дан ортиқ Stinger зенит тизими, 8500 дан ортиқ Javelin танкка қарши тизимлари, 232 та гаубица ва 2 миллиондан ортиқ артиллерия ўқ-дорилари, 38 та ҲИМАРС тизими ва уларнинг ўқ-дорилари, Патриот ҳаво мудофааси батареяси, 109 та Bradley пиёда жанговар машинаси ва 31 та Abrams танкини ўз ичига олган.
Европа давлатлари ҳам Украинага ёрдам бермоқда. НАТО бош котиби Енс Столтенберг уруш давом этаётган бир йил ичида Киевга кўрсатилган Ғарб давлатларининг умумий ҳарбий ва молиявий ёрдамини 120 миллиард долларга баҳолаган.
Изоҳ (0)