“НАТОга аъзо бўлиш барча муаммоларимизни ҳал қилмайди” — Финляндия президенти

Финляндия президенти Саули Ниинистё сайловлардан кейинги янги парламентнинг биринчи йиғилишида мамлакатнинг НАТО аъзоси сифатидаги янги мақоми “барча муаммоларни ҳал этолмаслигини” айтди. Бу ҳақда AP хабар бермоқда.

Финляндия раҳбарининг таъкидлашича, мамлакат Шимолий Атлантика алянсига қўшилганидан кейин ҳам “ўз хавфсизлиги учун асосий масъулиятни ўзи зиммасига олади”, шунинг учун “қаерда бўшлиқ ёки заифлик топилса, уларни тўлдириб, мустаҳкамлаш керак”.

Ниинистё қўшимча қилганидек, Россия билан 1 340 километрлик чегарага эга Финляндия Россиянинг Украинага кенг кўламли босқинидан кейин минтақавий хавфсизлик масалаларига эътиборини кучайтирди.

“Келажакда ҳушёрликнинг бу даражада пасайишига йўл қўймаслигимиз керак. Бу ерда биз кўриб турган хавф ва кескинлик ҳозирда ортиб бораётган геосиёсий босим билан қанчалик узвий боғлиқлигини яхши тушунишимиз керак”, — деди у.

2022 йилнинг май ойида Финляндия ва Швеция НАТОга қўшилиш учун ариза топширган эди. НАТО аъзоси сифатида Туркия аризани маъқуллаш учун ҳар икки давлатнинг олдига бир қатор шартларини қўйди. Швеция ҳали бу шартларни бажармаган.

4 апрель куни Финляндия расман НАТОга қўшилди ва унинг 31-аъзосига айланди.