Индонезияда тўрт нафар Ўзбекистон фуқароси ижтимоий тармоқларда террор ташвиқотини тарқатганликда айбланиб, қўлга олинганди. Уларнинг уч нафари қўриқчини ўлдириб, тергов изоляторидан қочиб кетди. Бу ҳақда Jakartа Globe хабар берди.
Полиция маълумотига кўра, террорчиликда гумонланган ўзбекистонликлар иммиграция хизмати ходимини ўлдириб, Шимолий Жакартадаги тергов изоляторидан қочиб кетган. Кейинроқ улардан бири Сунтер дарёсидан ўлик ҳолда топилган, яна икки нафари эса алоҳида жойларда аниқланиб, ҳибсга олинган.
Ҳодиса 10 апрель куни маҳаллий вақт билан соат 4:00 атрофида содир бўлган. Шимолий Жакарта иммиграция идораси ҳибсхонасининг амалдорлари ва қўриқчилари саҳарликка тайёрланаётган пайти юз берган.
“Ўзбекистон фуқаролари иммиграция хизмати ходими Ади Видодони ўлдириш учун ошхона пичоқларидан фойдаланган ва яна уч нафар изолятор ходими оғир яраланган. Тонг отишидан сал олдин тергов изоляторида сақланаётган уч хорижлик қочишга уриниб, иммиграция хизмати ходимлари ва 88-отряд зобитларига ҳужум қилди”, — дейди Миллий полиция аксилтеррор отряди вакили Асвин Сирегар.
Ҳужум қилганлар 26 дан 40 ёшгача бўлган тўрт нафар Ўзбекистон фуқароси бўлган.
“Улардан уч нафари қочишга муваффақ бўлди, қолган бири эса қочишдан бош тортди”, — деди Асвин.
Ҳужумдан кўп ўтмай қидирув операциясида гумондорлардан бири Букит Гадинг Индаҳ турар жой мажмуаси боғида қўлга олинган, иккинчи гумонланувчи эса Сунтер дарёси яқинидаги хандақ ичида яшириниб юрганида аниқланди.
“Яна бир гумондор Сунтер дарёсидан ўлик ҳолда топилди. У дарёга сакраган, бироқ чўкиб кетган. Унинг жасади Крамат Жати касалхонасига олиб кетилган”, — деди Асвин.
Аниқланишича, тергов изоляторидан қочиш режасини гумонланувчилар Ўзбекистоннинг Жакартадаги консуллиги ходимлари келганидан кейин амалга оширган.
“Улар ўз мамлакатларидаги қаттиқ жазодан қўрқиб, депортация бўлишни хоҳламаган”, — дейилади хабарда.
Ҳозирда тирик қолган уч гумондорга нисбатан қотиллик бўйича тергов жараёни бошланган.
Изоҳ (0)