Қорақалпоғистоннинг Элликқалъа туманидаги мактабларда ўқувчиларга тарқатилаётган озиқ-овқат маҳсулотлари ичидан дори чиққани айтилмоқда.
Telegramъдаги “Антикоррупция” каналининг ёзишича, мактабларда бундай ҳолат биринчи марта содир бўлмаяпти. Мактаб маъмурияти таъминотчи компания тегишли ҳужжатсиз озиқ-овқат маҳсулотларини етказиб бераётганини маълум қилган.
Кейинчалик Элликқалъа тумани ҳокимлиги ахборот хизмати ҳолат юзасидан муносабат билдирди. Унда таъкидланишича, ҳолат юзасидан туман прокуратураси ва санитария-эпидемиологик осойишталик ва жамоат саломатлиги бўлими масъул ходимлари томонидан ўрганиш ишлари олиб борилган.
5-умумий ўрта таълим мактабига 2023 йил 13 апрель куни “Табассум Нукус” томонидан 267 нафар ўқувчига етказилган озиқ-овқат маҳсулотлари мактаб ишчи гуруҳи томонидан қабул қилинган. Ҳолат юзасидан экспертиза хулосасини олиш учун озиқ-овқат маҳсулотлари намунаси Республика санитария-эпидемиологик осойишталик ва жамоат саломатлиги бошқармасига юборилган.
Эслатиб ўтамиз, аввалроқ Қорақалпоғистоннинг Хўжайли туманида мактаб ўқувчиларига берилган озиқ-овқат маҳсулотлари орасидан қум ва қизлар тўғноғичи чиққанди. Ҳолат Республика Халқ таълими вазирлиги назоратига олинган. 2023 йил 7 апрель куни Хўжайли туманидаги 41-сонли мактабга 388 ўқувчига (1–4-синф) тасдиқланган меню асосида ёнғоқли кекс, “Стел” шоколади, олма, ширин чой етказиб берилган.
Изоҳ (0)