Qoraqalpog‘istonning Xo‘jayli tumanida maktab o‘quvchilariga berilgan oziq-ovqat mahsulotlari orasidan qum va qizlar to‘g‘nog‘ichi chiqdi. Bu haqda “Daryo” muxbiri xabar berdi.
Maʼlum bo‘lishicha, holat Qoraqalpog‘iston Respublikasi Xalq taʼlimi vazirligi nazoratiga olingan.
2023-yil 7-aprel kuni Xo‘jayli tumanidagi 41-sonli maktabga 388 o‘quvchiga (1-4-sinf) tasdiqlangan menyu asosida yong‘oqli keks, “Stel” shokoladi, olma, shirin choy yetkazib berilgan.
Shu kuni 2-b sinf o‘quvchilariga berilgan “Stel” shokoladidan qum chiqqan. Bu haqda shu sinf rahbari B.Bekbo‘sinova maktab rahbariyatiga videoxabar orqali murojaat qilgan. Maktab rahbariyati esa oziq-ovqat yetkazib beradigan keytering korxonasiga xabar bergan.
“Maktabga oziq-ovqat mahsulotlari 2022-yil 10-oktabrdan ‘Bekbergen servis orayi’ MCHJ tomonidan yetkazib beriladi. O‘rganish ishlari davomida 7-aprel kuni ertalabki soat 09:45 da olib kelingan oziq-ovqat mahsulotlarini maxsus komissiya aʼzolari R.Erejepova, A.Abdisametova, D.Niyozova, N.Avezova va Q.Ametovalar qabul qilib olgan. Videodagi yuvilmagan olma bo‘yicha holat esa joriy yilning 7-fevral kuni olib kelingan mahsulot ekani, bu bo‘yicha keytering korxonasiga va komissiya aʼzolariga ogohlantirish berilgani maʼlum qilindi”, — deyiladi vazirlik xabarida.
Qo‘shimcha qilinishicha, vazirlik kamchiliklarni bartaraf qilish bo‘yicha tegishli tartibda choralar ishlab chiqqan va o‘rganish ishlari amalga oshirilishini, natijasi haqida maʼlumot berilishini maʼlum qilgan.
Mazkur holat yuzasidan “Daryo” muxbiri qo‘shimcha surishtiruv olib bormoqda.
Izoh (0)