Qoraqalpog‘istonning Ellikqal’a tumanidagi maktablarda o‘quvchilarga tarqatilayotgan oziq-ovqat mahsulotlari ichidan dori chiqqani aytilmoqda.
Telegram’dagi “Antikorrupsiya” kanalining yozishicha, maktablarda bunday holat birinchi marta sodir bo‘lmayapti. Maktab ma’muriyati ta’minotchi kompaniya tegishli hujjatsiz oziq-ovqat mahsulotlarini yetkazib berayotganini ma’lum qilgan.
Keyinchalik Ellikqal’a tumani hokimligi axborot xizmati holat yuzasidan munosabat bildirdi. Unda ta’kidlanishicha, holat yuzasidan tuman prokuraturasi va sanitariya-epidemiologik osoyishtalik va jamoat salomatligi bo‘limi mas’ul xodimlari tomonidan o‘rganish ishlari olib borilgan.
5-umumiy o‘rta ta’lim maktabiga 2023-yil 13-aprel kuni “Tabassum Nukus” tomonidan 267 nafar o‘quvchiga yetkazilgan oziq-ovqat mahsulotlari maktab ishchi guruhi tomonidan qabul qilingan. Holat yuzasidan ekspertiza xulosasini olish uchun oziq-ovqat mahsulotlari namunasi Respublika sanitariya-epidemiologik osoyishtalik va jamoat salomatligi boshqarmasiga yuborilgan.
Eslatib o‘tamiz, avvalroq Qoraqalpog‘istonning Xo‘jayli tumanida maktab o‘quvchilariga berilgan oziq-ovqat mahsulotlari orasidan qum va qizlar to‘g‘nog‘ichi chiqqandi. Holat Respublika Xalq ta’limi vazirligi nazoratiga olingan. 2023-yil 7-aprel kuni Xo‘jayli tumanidagi 41-sonli maktabga 388 o‘quvchiga (1–4-sinf) tasdiqlangan menyu asosida yong‘oqli keks, “Stel” shokoladi, olma, shirin choy yetkazib berilgan.
Izoh (0)