Халқаро бокс ассоциациясининг (IBA) ғарб мамлакатлари билан муносабатлари тобора кескинлашиб боряпти.
АҚШ ва Буюк Британия IBA таркибидан чиқиб, алоҳида ташкилот яратишни режа қилмоқда, дея хабар қилмоқда Inside the Games.
АҚШ ва Буюк Британиянинг бойкотига бир нечта Европа мамлакатлари қўшилишга тайёр. Улар World Boxing ташкилотига асос солмоқчи. Томонлар 13 апрель куни ушбу масала бўйича онлайн брифинг ўтказади.
IBA эса Халқаро Олимпия қўмитасига (ХОҚ) ариза юборган ва Париж—2024 Олимпиадаси учун йўлланма бериши кутилаётган Европа ўйинларини лицензион мусобақа мақомидан маҳрум этишни сўраган.
IBA Россия ва Беларусь боксчилари Европа ўйинлари мусобақасидан четлатилганини бунга сабаб сифатида кўрсатган.
Европа ўйинлари 21 июндан 2 июлга қадар Польшада бўлиб ўтади. Ундаги бокс мусобақасида Париж—2024 Олимпия ўйинларига йўлланмалар ўйналади.
Аввалроқ АҚШ, Швеция, Ирландия, Чехия ва Канада бокс федерациялари Ҳиндистон (аёллар ўртасида) ва Ўзбекистонда (эркаклар ўртасида) бўлиб ўтадиган бокс бўйича Жаҳон сҳемпионатига бойкот эълон қилгани хабар қилинганди. Кейинчалик Украина ва Норвегия ҳам уларга қўшилган. Бунга сабаб сифатида федерациялар Россия ва Беларусь боксчиларига мусобақаларда ўз байроғи остида ҳаракат қилишга рухсат берилганини қайд этганди.
Эслатиб ўтамиз, россиялик Умар Кремлёв 2020 йилнинг декабридан буён IBA’ни бошқариб келмоқда. Бунгача у Россия бокс федерацияси бош котиби лавозимида ишлаган. У лавозимга тайинланган пайтда IBA’нинг қарзлари 20 миллион долларни ташкил қилган. 2021 йилнинг май ойида Кремль барча қарзларнинг тўлиқ қайтарилишини эълон қилган. 2022 йилда Кремлёв IBA президентлигига қайта сайланди.
Изоҳ (0)