Чемпионлар Лигаси чорак финали доирасида “Манчестер Сити”га қарши кечган ўйиндан кейин “Бавария” футболчилари Садио Мане ва Лерой Сане ўртасида келишмовчилик юзага келган.
Кийиниш хонасида сенегаллик футболчи жамоадошининг юзига зарба берган. Оқибатда Леройнинг лаби ёрилган. Шундан кейин “Бавария”нинг бошқа футболчилари дарҳол уларни ажратган. Кийиниш хонасидан Санени олиб чиқиб кетишган.
Футболчилар ўртасидаги келишмовчилик майдондаёқ бошланганди. 83-дақиқада футболчилар тортишаётгани акс этган эпизод трансляцияда кўринган. Бу кескинлик ўйиндан кейин яна-да авж олган. Тахминларга кўра, Садиога жамоадошининг қўпол гаплари ёқмаган.
Sky Sport Deutschland журналисти Флориан Плеттенбергга кўра, “Бавария” Маненинг бу қилиғини жазосиз қолдирмоқчи эмас, бу иш фақат жарима билан тугамаслиги катта эҳтимол. Шунингдек, бу ҳолат “Бавария”нинг бошқа футболчиларини ҳайратда қолдирган. Кўпчилик бу воқеадан кейин Маненинг клубда қолишига ишонмаяпти.
“Жорий мавсумдан кейин Мане Мюнхенда қолади деб ўйламайман”, — дейди журналист.
Ҳозирча “Бавария” бунга расмий муносабат билдирмади. Айни вақтда клубда сенегаллик футболчининг ҳаракатлари юзасидан суриштирув кетяпти ва тез орада унинг қилмишига баҳо берилади. Мане жаримага тортилиши ёки машғулотлардан четлатилиши мумкин. Шунингдек, футболчи билан шартномани бекор қилишлари ҳам мумкин.
Аввалроқ “Бавария” собиқ бош мураббийи Юлиан Нагелсманн жамоа дарвозабони Мануэль Нойер билан келишмовчиликка борганди. Нагелсманнинг талаби билан “Бавария” дарвозабонлар мураббийи Тони Тапалович вазифасидан озод этилган ва Нойер бу вазият борасидаги норозилигини ОАВ орқали кескин билдирганди.
Изоҳ (0)