Дунёда шакар нархи 12 йиллик энг юқори даражага етди

Лондон фонд биржасида шакар нархи 2011 йилдан бери энг юқори даражага кўтарилди. Бу ҳақда “Дарё”га биржа матбуот хизматидан маълум бўлди.

Бугун, 12 апрель куни савдолар чоғида шакар нархи бир тонна учун 705 АҚШ долларига етди.

Тошкент вақти билан 15:35 ҳолатига кўра, Лондон фонд биржасида шакар бир тонна учун 701,7 АҚШ долларидан сотилмоқда.

Bloomberg маълумотларига кўра, нархларнинг мисли кўрилмаган ўсишига Ҳиндистондан шакар экспорти қисқариши, шунингдек, бошқа мамлакатлар — Покистон ва Таиланддан етказиб беришнинг камайиши кутилаётгани сабаб бўлиши мумкин.

Бундан ташқари, нефть нархининг сўнгги ўсиши Бразилия ва Ҳиндистонда тегирмонларни кўпроқ шакарқамишни этанол ишлаб чиқаришга йўналтиришга ундаши мумкин, чунки ёқилғи ишлаб чиқариш энди фойдалироқ.

Бразилиянинг жаҳон бозорларига шакар етказиб бериш ҳажми мамлакатда бензин нархининг ошиши туфайли пасаймоқда. Бу эса истеъмолчиларни биоёқилғи ва этанолга ўтишга ҳам мажбур қилган.

Натижада, шакарқамишнинг муҳим қисми ушбу маҳсулотларни ишлаб чиқаришга кетади ва озиқ-овқат саноати учун етказиб бериш камаяди.

27 март—2 апрель кунлари Ўзбекистон товар-хом ашё биржасида шакарнинг барча категорияси бўйича шаклланган кунлик ўртача нархлар маҳсулотнинг бир тоннаси учун 13,3 млн сўмдан 12,1 млн сўмгача, яъни 8,7 фоизга пасайган.