Dunyoda shakar narxi 12 yillik eng yuqori darajaga yetdi

London fond birjasida shakar narxi 2011-yildan beri eng yuqori darajaga ko‘tarildi. Bu haqda “Daryo”ga birja matbuot xizmatidan ma’lum bo‘ldi.

Bugun, 12-aprel kuni savdolar chog‘ida shakar narxi bir tonna uchun 705 AQSH dollariga yetdi.

Toshkent vaqti bilan 15:35 holatiga ko‘ra, London fond birjasida shakar bir tonna uchun 701,7 AQSH dollaridan sotilmoqda.

Bloomberg ma’lumotlariga ko‘ra, narxlarning misli ko‘rilmagan o‘sishiga Hindistondan shakar eksporti qisqarishi, shuningdek, boshqa mamlakatlar — Pokiston va Tailanddan yetkazib berishning kamayishi kutilayotgani sabab bo‘lishi mumkin.

Bundan tashqari, neft narxining so‘nggi o‘sishi Braziliya va Hindistonda tegirmonlarni ko‘proq shakarqamishni etanol ishlab chiqarishga yo‘naltirishga undashi mumkin, chunki yoqilg‘i ishlab chiqarish endi foydaliroq.

Braziliyaning jahon bozorlariga shakar yetkazib berish hajmi mamlakatda benzin narxining oshishi tufayli pasaymoqda. Bu esa iste’molchilarni bioyoqilg‘i va etanolga o‘tishga ham majbur qilgan.

Natijada, shakarqamishning muhim qismi ushbu mahsulotlarni ishlab chiqarishga ketadi va oziq-ovqat sanoati uchun yetkazib berish kamayadi.

27-mart—2-aprel kunlari O‘zbekiston tovar-xomashyo birjasida shakarning barcha kategoriyasi bo‘yicha shakllangan kunlik o‘rtacha narxlar mahsulotning bir tonnasi uchun 13,3 mln so‘mdan 12,1 mln so‘mgacha, ya’ni 8,7 foizga pasaygan.