Кувайтда сунъий интеллектга асосланган виртуал янгиликлар телебошловчиси яратилди. Бу ҳақда Daily Mail хабар берди.
Виртуал бошловчига Федҳа исми берилган, у Kuwait News телеканалида фаолият олиб боради. Аёлнинг сочи сариқ бўлиб, видеода қора костюм ва оқ кофтада кўриниш берган. У ўзини “Кувайтнинг биринчи виртуал янгиликлар бошловчиси” деб таништиради ва мақсади “томошабинларни холис ва ишончли маълумот билан таъминлаш” эканини айтади. Шунингдек, у “профессионал ва мустақил” бўлишга ваъда беради ва томошабинларни янгиликларни кузатишга ундайди.
Федҳанинг пайдо бўлишига муносабат
Айрим ижтимоий тармоқ фойдаланувчилари технологик ютуқдан ҳайратда эканини билдириб, график ва анимация сифатини юқори баҳолади. Бироқ бошқалар виртуал бошловчининг ташқи кўриниши ва исмини танқид қилиб, у Қувайт маданияти ва анъаналарига мос келмайди деб ҳисоблаган.
Шунингдек, бундай технологиялар ахборотни манипуляция қилиш ва сохта хабарларни тарқатиш учун ишлатилиши мумкинлигидан хавотир билдирилган.
Кувайт виртуал янгиликлар бошловчилари билан тажриба ўтказган биринчи давлат эмас. 2018 йилда Хитой иккита шундай бошловчини тақдим этган — бири хитой тилида, иккинчиси инглиз тилида. Улар ҳақиқий журналистлар асосида яратилган, жумладан, уларнинг юз ифодалари ва интонациясига тақлид қилинган.
Изоҳ (0)