АПЛ. “Арсенал” “Ливерпуль”га қарши ўйинда 2 тўп фарқи билан олдинга бориб, ғалабани қўлдан чиқарди

Футбол бўйича Англия Премьер Лигасининг 30-турида “Ливерпуль” 9 апрель, якшанба куни “Арсенал”ни қабул қилди.

Учрашувнинг 8-дақиқасида Габриэль Мартинелли лондонликларни ҳисобда олдинга олиб чиқди. 28-дақиқада Габриэль Жезус орадаги фарқни иккитага етказди. Биринчи бўлим охирлаб бораётган вақтда Муҳаммад Салоҳ “қизиллар”нинг жавоб тўпини киритди.

Иккинчи бўлим бошида майдон эгалари пенальти ишлаб олди, бироқ Салоҳ 11 метрлик жарима зарбасини голга айлантиролмади. 87-дақиқада Роберто Фирмино қанотдан узатилган тўпни боши билан дарвозага жойлаб қўйди. Қолган дақиқалар “Ливерпуль”нинг катта устунлиги остида ўтди, бироқ дарвозалар бошқа ишғол этилмади.

“Арсенал” 73 очко билан ҳамон пешқадам бўлиб турибди ва битта захира ўйинига “Манчестер Сити”ни 6 очкога ортда қолдиряпти. “Ливерпуль” 44 очко билан 8-поғонани банд этган.

АПЛ

30-тур баҳслари

9 апрель, якшанба

“Ливерпуль” – “Арсенал” 2:2

Голлар: 0:1 – 8 Мартинелли, 0:2 – 28 Габриэль Жезус, 1:2 – 42 Салоҳ, 2:2 – 87 Фирмино.

“Ливерпуль”: Алиссон, Александер-Арнолд, ван Дейк, Konaте, Робертсон, Ҳендерсон, Фабиньо (Фирмино, 78), Жонс (Тиаго Алькантара, 60), Салоҳ, Диогу Жота (Нуньес, 60), Гакпо.

“Арсенал”: Рэмсдейл, Уайт, Ҳолдинг, Габриэль, Зинченко (Тирни, 88), Жака, Парти, Эдегор (Кивер, 80), Сака, Мартинелли, Габриэль Жезус (Троссард, 80).

Огоҳлантиришлар: Уайт (23), ван Дейк (31), Жака (41), Александер-Арнолд (41), Робертсон (45), Рэмсдейл (53), Фабиньо (55), Сака (84).

“Лидс” – “Кристал Пэлас” 1:5

Голлар: 1:0 – 21 Бемфорд, 1:1 – 45 Гехи, 1:2 – 53 Айю, 1:3 – 55 Эзе, 1:4 – 69 Эдуар, 1:5 – 77 Айю.