Испания Ла Лигаси навбатдаги тури доирасида ўтган “Реал” — “Вильярреал” учрашувидан (2:3) кейин мадридликлар ярим ҳимоячиси Федерико Вальверде ва меҳмонлар вакили Алекс Баэна ўртасида келишмовчилик келиб чиққан.
Уругвайлик футболчи ўйиндан кейин Алексни автотураргоҳда кутиб турган ва унинг юзига зарба берган. Marcaънинг ёзишича, полицияда воқеа тасвирланган видео бор. Баэна рақибининг шахсий ҳаётига оид ножоиз гап айтгани айтилмоқда.
Икки футболчи ўртасидаги келишмовчилик майдондаёқ сезилганди. Марио Кортеганага кўра, Феде ўйин вақтида Баэнага мушт туширмоқчи бўлган, бироқ ўзини тийган. Вальверде кўчада гаплашиб олишини айтган, рақиб эса бунга эътибор қаратмаган.
Улар ўртасидаги кескин муносабат анчадан бери бор. Испания Кубогининг 1/8 финалида Баэна Вальвердега қўполлик ишлатган ва шундай деб бақирганди: “Йиғла, ахир сени ўғлинг туғилмайди”. Версияларга кўра, сўнгги ўйинда ҳам Алекс ушбу мавзуда яна бирор нима деган ва бу Валердени қуйишқондан чиқарган.
Cadena SER маълумотларига кўра, уругвайлик футболчи автотураргоҳда Баэнадан майдонда айтган гапларини қайтаришни сўраган. Баэна қайтарган ва юзидан зарба қабул қилиб олган.
Воқеадан кейин “Вильярреал” делегати Хиско Навас ижтимоий тармоқларда Вальвердени каллакесар ва қўрқоқ деб атаб, пост қолдирган. Бироқ уни бир неча дақиқадан кейин ўчириб юборган.
Алекс бу вазиятга қуйидагича изоҳ берди: “Рақиб майдонидаги ажойиб ғалабадан хурсандман, бироқ шу билан бирга ўйиндан кейинги агрессиядан қаттиқ қайғуга тушдим”.
Шунингдек, “Вильярреал” футболчиси январь ойидаги ўйинда ҳам бу гапларни айтмагани қайд этиб, Вальверденинг ўғли ҳақидаги маълумотлар февраль ойида маълум бўлгани ҳақида айтган. Аслида эса Вальверденинг турмуш ўртоғи Мино Бонино ўйиндан 3-4 кун аввалги постида бу ҳақда маълум қилганди.
“Реал” бу вазиятга изоҳ беришни истамаган. “Вильярреал” эса ўз футболчисига нисбатан ҳужум бўлгани ва Баэна бу борада полицияга арз қилганини қайд этган.
“Вильярреал” футболчиси жамоа автобуси томон ҳаракатланаётган вақтда ҳужумга учради. Клуб зўравонликнинг ҳар қандай кўринишини қабул қилмайди, ўз футболчисининг гапларига тўлиқ ишонади ва суриштирув жараёнида уни қўллаб-қувватлайди, — дейилади баёнотда.
El Chiringuito хабарида айтилишича, Вальверденинг яқинлари Баэнадан полицияга арз қилмасликни сўраган. “Вильярреал” ўйинчиси эса шарт қўйган, унга кўра Феде ва унинг яқинлари Баэна Вальверденинг ўғли ҳақида гапирмаганини айтиши керак бўлган.
Энди нима бўлади?
Испания қонунчилигига кўра, мазкур ҳолатда Вальверде кўпи билан катта миқдордаги жарима билан қутулиб қолади.
Спорт томондан олинса, бу Ла Лига вазиятга қандай баҳо беришига боғлиқ. Учрашув ҳаками бу вазиятни қайдномасига ёзмаган ва ҳолат стадиондан ташқарида содир бўлган. Шу тариқа Феде санкциялардан қутулиб қолади.
Бироқ лига суриштирув ўтказадиган бўлса, футболчи “спортчига хос бўлмаган” ҳаракати учун бир неча ўйинга четлатилиши мумкин.
Изоҳ (0)