Ispaniya La Ligasi navbatdagi turi doirasida o‘tgan “Real” — “Vilyarreal” uchrashuvidan (2:3) keyin madridliklar yarim himoyachisi Federiko Valverde va mehmonlar vakili Aleks Baena o‘rtasida kelishmovchilik kelib chiqqan.
Urugvaylik futbolchi o‘yindan keyin Aleksni avtoturargohda kutib turgan va uning yuziga zarba bergan. Marca’ning yozishicha, politsiyada voqea tasvirlangan video bor. Baena raqibining shaxsiy hayotiga oid nojoiz gap aytgani aytilmoqda.
Ikki futbolchi o‘rtasidagi kelishmovchilik maydondayoq sezilgandi. Mario Korteganaga ko‘ra, Fede o‘yin vaqtida Baenaga musht tushirmoqchi bo‘lgan, biroq o‘zini tiygan. Valverde ko‘chada gaplashib olishini aytgan, raqib esa bunga e’tibor qaratmagan.
Ular o‘rtasidagi keskin munosabat anchadan beri bor. Ispaniya Kubogining 1/8 finalida Baena Valverdega qo‘pollik ishlatgan va shunday deb baqirgandi: “Yig‘la, axir seni o‘g‘ling tug‘ilmaydi”. Versiyalarga ko‘ra, so‘nggi o‘yinda ham Aleks ushbu mavzuda yana biror nima degan va bu Valerdeni quyishqondan chiqargan.
Cadena SER ma’lumotlariga ko‘ra, urugvaylik futbolchi avtoturargohda Baenadan maydonda aytgan gaplarini qaytarishni so‘ragan. Baena qaytargan va yuzidan zarba qabul qilib olgan.
Voqeadan keyin “Vilyarreal” delegati Xisko Navas ijtimoiy tarmoqlarda Valverdeni kallakesar va qo‘rqoq deb atab, post qoldirgan. Biroq uni bir necha daqiqadan keyin o‘chirib yuborgan.
Aleks bu vaziyatga quyidagicha izoh berdi: “Raqib maydonidagi ajoyib g‘alabadan xursandman, biroq shu bilan birga o‘yindan keyingi agressiyadan qattiq qayg‘uga tushdim”.
Shuningdek, “Vilyarreal” futbolchisi yanvar oyidagi o‘yinda ham bu gaplarni aytmagani qayd etib, Valverdening o‘g‘li haqidagi ma’lumotlar fevral oyida ma’lum bo‘lgani haqida aytgan. Aslida esa Valverdening turmush o‘rtog‘i Mino Bonino o‘yindan 3-4 kun avvalgi postida bu haqda ma’lum qilgandi.
“Real” bu vaziyatga izoh berishni istamagan. “Vilyarreal” esa o‘z futbolchisiga nisbatan hujum bo‘lgani va Baena bu borada politsiyaga arz qilganini qayd etgan.
“Vilyarreal” futbolchisi jamoa avtobusi tomon harakatlanayotgan vaqtda hujumga uchradi. Klub zo‘ravonlikning har qanday ko‘rinishini qabul qilmaydi, o‘z futbolchisining gaplariga to‘liq ishonadi va surishtiruv jarayonida uni qo‘llab-quvvatlaydi, — deyiladi bayonotda.
El Chiringuito xabarida aytilishicha, Valverdening yaqinlari Baenadan politsiyaga arz qilmaslikni so‘ragan. “Vilyarreal” o‘yinchisi esa shart qo‘ygan, unga ko‘ra Fede va uning yaqinlari Baena Valverdening o‘g‘li haqida gapirmaganini aytishi kerak bo‘lgan.
Endi nima bo‘ladi?
Ispaniya qonunchiligiga ko‘ra, mazkur holatda Valverde ko‘pi bilan katta miqdordagi jarima bilan qutulib qoladi.
Sport tomondan olinsa, bu La Liga vaziyatga qanday baho berishiga bog‘liq. Uchrashuv hakami bu vaziyatni qaydnomasiga yozmagan va holat stadiondan tashqarida sodir bo‘lgan. Shu tariqa Fede sanksiyalardan qutulib qoladi.
Biroq liga surishtiruv o‘tkazadigan bo‘lsa, futbolchi “sportchiga xos bo‘lmagan” harakati uchun bir necha o‘yinga chetlatilishi mumkin.
Izoh (0)