Жаҳон ва ўзбек шоу-бизнеси вакилларининг Instagram саҳифаларига жойлаштирилган қизиқарли фото ва видеоларни эътиборингизга ҳавола этамиз.
Ўзбекистон халқ артисти Мурод Ражабов 8 апрель куни 74 ёшида ҳаётдан кўз юмди. Ушбу хабар нафақат ўзбек киноси ихлосмандлари, балки санъат олами вакиллари қалбини ҳам ларзага келтирди. Ўзбек шоу-бизнеси вакиллари Instagram’даги саҳифаларида Мурод Ражабовни хотирламоқда.
Райҳон Ғаниева саҳифасига Мурод Ражабов билан бирга тушган суратини жойлаб, “Биз ҳаммамиз Аллоҳникимиз ва унга қайтгувчимиз”, деб ёзиб қолдирди.
“Ўзи кулмай, мутлақо жиддий туриб кулдира оладиган актёр кетди”, — деб ёзмоқда Даврон Кабулов.
Отабек Маҳкамовнинг фикрича, Мурод Ражабов нафақат профессионал ижодкор, балки ички фалсафаси кучли шахс эди. “Мурод акани ҳамиша эслаб турамиз, жойлари жаннатда бўлсин”, — деб ёзади актёр.
Таниқли сўз устаси Мирзабек Холмедов Мурод Ражабов билан “Улфатлар” фильмида бирга ишлаган эди. “Улфатлар девори қулади. Мурод Ражабов энди орамизда йўқ”, — дейди Мирзабек Холмедов.
Улуғбек Қодиров ҳам актёрнинг ўлимидан изтиробда эканлигини билдирди ҳамда “Охиратингиз обод бўлсин, устоз”, — дея ёзиб қолдирди.
Таниқли кинорежиссёр Рустам Саъдиев саҳифасига “Келгинди куёв” фильмидан парчани жойлаштирди ҳамда “Мурод Ражабовдек буюк артист билан ҳамкорлик қилганимдан фахрланаман”, — деб ёзди.
Вайнер Liil Хуррамов Сурхондарё вилоятининг Денов туманида қариндошлари яшайдиган ҳовлига борди ҳамда болалигидаги қийинчиликлари ҳақида кузатувчиларига сўзлаб берди.
Хонанда ДЖ Пилигрим Mercedes GLE 350э гибрид автомобилини харид қилгани ҳақида мухлисларига сўзлаб берди.
Вайнер Имона Ғайратова ота-онасига Умра йўлланмасини совға қилди ҳамда ушбу қувончини мухлислари билан бўлишди.
Изоҳ (0)