“Маданият ва маърифат” телеканали “Карвон” деб қайта номланмоқда

“Маданият ва маърифат” телеканали негизида “Карвон” каналини ташкил этиш тўғрисидаги қарор лойиҳаси эълон қилинди. Бу ҳақда “Дарё”га телеканал масъул ходими хабар берди.

Ҳужжат лойиҳасига кўра, Ўзбекистон Миллий телерадиокомпаниясининг “Маданият ва маърифат” телеканали негизида унинг молиялаштириш ва меҳнатга ҳақ тўлаш тартиби, штат бирликларини сақлаган ҳолда Маданият ва туризм вазирлиги тизимида “Карвон” телеканали ташкил этилиши кутилмоқда.

Ўзбекистон кино, театр, мусиқа, хореография, цирк, тасвирий ва амалий санъат намуналарини, ташқи ва ички туризмни ҳар томонлама кенгайтириш борасида яратилаётган имкониятларни, бағрикенглик ва инсонпарварлик маданиятини юксалтириш, миллатлараро ва конфессиялараро ҳамжиҳатликни, фуқаролар тотувлигини таъминлаш, шунингдек, хорижий мамлакатлар билан дўстона, тенг ҳуқуқли ва ўзаро манфаатли муносабатларни мустаҳкамлашга қаратилган ислоҳотлар жараёнини кенг ёритиш янги телеканалнинг асосий вазифаси ҳисобланади.

“Карвон” телеканали давлат муассасаси ҳамда “Маданият ва маърифат” телеканалининг ҳуқуқлари, мажбуриятлари ва шартномалари, шу жумладан халқаро шартномалари бўйича ҳуқуқий вориси ҳисобланади. Маданият ва туризм вазирлиги билан келишган ҳолда юқори малакали хорижий мутахассисларни шартнома асосида жалб этиш ва ишга қабул қилиш ҳамда ажратилган бюджет маблағлари доирасида уларга иш ҳақини миллий валютада ёки хориждаги ҳисобварақларига ўтказган ҳолда чет эл валютасида тўлашга рухсат берилади.

“'Маданият ва маърифат' ўрнига ташкил қилиниши кутилаётган каналнинг 'Карвон' деб номланишига қараганда, унинг туризмга ихтисослашувини тахмин қилиш мумкин. Бироқ бир неча йил олдин Туризмни ривожлантириш давлат қўмитаси раиси Азиз Абдуҳакимов 'Дунё бўйлаб' каналини 'Туризм 365' каналига ўзгартириш режалари ҳақида хабар берган эди. Умуман, 'Дунё бўйлаб' каналининг расмий сайтига кўра, мамлакатимизнинг диққатга сазовор масканлари, муқаддас қадамжолари, ноёб тарихий-меъморий обидалари тўғрисидаги илмий-оммабоп ва маърифий теледастурларни яратиш айнан 'Дунё бўйлаб' каналининг вазифаси ҳисобланади. Демак, маданият ва санъат йўналишидаги ягона телеканални ёпишга зарурат йўқ”, — деб ёзади таълим бўйича эксперт Комил Жалилов.