Мактабгача ва мактаб таълими вазирлиги, Таълим бўйича глобал ҳамкорлик (GPE), UNICEF ҳамда миллий ва халқаро ҳамкорлар билан биргаликда, 2023—2026 йилларда таълим соҳасини ислоҳ қилиш бўйича йўл харитасини тақдим этди. Бу ҳақда UNICEF матбуот хизмати хабар берди.
Ҳужжат Ўзбекистонда 2026 йилгача бўлган ривожланиш стратегиясига мувофиқ 2026 йилгача бўлган натижалар ва мақсадлар белгиланган мактабгача ва мактаб таълимини ислоҳ қилишдаги ўлчаш мумкин бўлган устувор йўналишларни белгилайди.
Ривожланиш бўйича ҳамкорлар Йўл харитасини татбиқ этиш бўйича мажбуриятларини, жумладан, кейинги уч йил давомида таълим соҳасини такомиллаштиришга 580 миллион доллардан ортиқ сармоя киритилишни тасдиқлаган.
Мактабгача ва мактаб таълими вазири Ҳилола Умарованинг қайд этилишича, йўл харитаси нафақат таълим соҳасида иштирок этувчи турли манфаатдор томонлар ўртасидаги мувофиқлаштиришни кучайтириш, “балки энг самарали ечимларни кенгайтириш имконини бериши кутилмоқда”.
Мазкур Йўл харитаси доирасида қуйидаги йўналишларда биргаликда иш олиб бориш кўзда тутилмоқда:
- ўқитувчилар малакасини ошириш,
- ўқувчилар билимини адолатли баҳолаш тизимини жорий этиш,
- мактабларнинг моддий техник базасини мустаҳкамлаш,
- замонавий дарсликлар ишлаб чиқиш ва жорий этиш,
- таълимда бошқарув тизимини такомиллаштириш.
Таъкидланишича, айни пайтда 3 ёшдан 6 ёшгача бўлган болаларни қамраб олишни 80 фоизга етказиш учун мактабгача таълим тизимида қўшимча 620 минг ўрин ҳамда 2026 йилгача халқ таълими тизимидаги мактабларда 1,2 миллионга яқин ўрин керак бўлади.
Таълим соҳасида фаолият кўрсатаётган ташклотлар ўртасида ҳаракатларни мувофиқлаштириш бўлмагани Йўл харитасини ишлаб чиқиш зарурлигини кўрсатди. Эндиликда мазкур йўл харитаси 54 та ҳамкор ташкилотни бирлаштириб, таълим секторидаги ислоҳотларни амалга ошириш учун аниқ дастурни таъминлайди. Мазкур ҳужжат этика, виждон, коррупцияга қарши кураш, адолат ва инсон ҳуқуқларини амалга ошириш тамойилларига асосланади.
.jpg)
“Сифатли инсон капитали давлат ўшишининг асосидир. Мавжуд демографик имкониятларни дивидендга айлантириш учун Ўзбекистон, ривожланиш бўйича ҳамкорлар билан биргаликда, таълимга сармоя киритишни устувор йўналиш қилишда давом этиши керак. Йўл харитасини ишлаб чиқиш жараёнида бу йўналишдаги муҳим қадамлар белгилаб олинди”, деди UNICEF’нинг Ўзбекистондаги ваколатхонаси раҳбари Мунир Мамедзаде.
“Бунга эришиш учун мактаб ва мактабгача таълим инфратузилмасини кенгайтириш ва модернизация қилишга йирик сармоялар киритиш, шу билан бирга сифатли инклюзив таълимдан фойдаланиш имкониятларини яхшилаш тенг даражада зарурдир”, — дея таъкидлайди у.
Маълумот учун, Ўзбекистонда ҳаракатлар стратегияси доирасида умумтаълим мактаблари сони 2017 йилги 9 718 тадан 2021 йилда 10 289 тага кўпайган.
Изоҳ (0)