Лондон жаҳон молия марказлари рейтингида ягона етакчиликни бой берди
City of London Corp йиллик тадқиқотига кўра, Лондон жаҳон молия марказлари рейтингидаги ягона етакчилигини йўқотди.
“Бизнинг глобал бизнес таклифимиз: Лондон ва ўсишни қўллаб-қувватлаш учун Буюк Британиянинг рақобатдош устунлиги” деб номланган Лондон шаҳри ҳисоботида 95 та кўрсаткич бўйича дунёнинг етакчи молия марказлари рейтинги берилган.
Натижада Лондон ўзининг умумий рақобатбардошлик кўрсаткичини 59 дан 60 га ошириб, биринчиликни сақлаб қолди.
“Бироқ, бундай юқори кўрсаткичларга қарамай, тадқиқотда биринчи марта Лондон яққол етакчига айланмади — бошқа молия марказлари рейтингда тезроқ ҳаракатланмоқда”, — дейилади тадқиқотда.
Рейтингда биринчи ўринни Лондон билан ўтган йили иккинчи поғонани эгаллаган Нью-Йорк эгаллаб турибди.
Ҳисоботда қайд этилишича, кўпроқ компаниялар АҚШ IPO’ларига ариза топширганлиги сабабли у рақобатбардошлик кўрсаткичини 58 дан 60 га оширган (Z/Yen тадқиқотига кўра, Нью-Йорк 2018 йилда Лондонни дунёнинг етакчи молиявий маркази сифатида ортда қолдирганини эслатади).
Жаҳон молия марказлари рейтингида учинчи ўринни Сингапур (51 балл), кейинги ўринларни Франкфурт (46), Париж (43), Гонконг (37) ва Токио (35) эгаллаб турибди.
“Буюк Британия халқаро бозорларга АҚШ, Франция ёки Японияга қараганда яхшироқ кириш имкониятига эга энг очиқ ва глобал молиявий марказлардан бири бўлиб қолмоқда. Аммо бизнинг рақобатдош устунлигимиз хавф остида. Молиявий ва профессионал хизматлар соҳасида ўсишни рағбатлантириш учун узоқ муддатли режа керак”, — деди City of London Corp раиси Крис Хейвард.
Корпорация маълумотларига кўра, Буюк Британия халқаро қарзларни чиқариш, тижорат (қайта) суғурталаш ва валюта савдоси бўйича дунёдаги энг йирик марказ, шунингдек, активларни бошқариш бўйича иккинчи йирик марказ бўлиб қолмоқда.
2022 йилда Буюк Британиянинг тез ривожланаётган технологик компаниялари 24 миллиард фунт стерлинг (29,6 миллиард доллар) миқдорида рекорд даражадаги сармоя жалб этди.
Бироқ, тахминлар кўра, Буюк Британия Европа Иттифоқидан чиққанидан кейин рўйхатдан ўтувчи компаниялар сони камаяди.
