Навоий вилояти Навбаҳор туманидаги 9-мактаб директори Дилдора Туробова ўқитувчиларни “Ташаббусли бюджет”га овоз тўплашга мажбурлагани айтилмоқда.
Вилоят Мактабгача ва мактаб таълими бошқармаси раҳбари Ўткир Тиллаев бошчилигида мазкур ҳолат тегишли масъуллар билан биргаликда зудлик билан атрофлича ўрганиб чиқилган.
Ўрганиш натижаларига кўра, ҳақиқатан ҳам интернетдаги аудио 9-мактаб директорига тегишли экани аниқланган ва унга нисбатан иш берувчининг тегишли буйруғига асосан интизомий жазо чораси қўлланилган.
Ижтимоий тармоқда тарқалган аудиохабарда мактаб директори мажлисда ўқитувчиларнинг ҳар бири “Ташаббусли бюджет” учун 100 тадан овоз тўплаши кераклигини айтганини эшитиш мумкин. “Агар шуни ютолмасам, ҳамманинг қонини ичаман, ҳамманг миллионлаб ойлигингни қўясан”, — деб таъкидлаган раҳбар.
Шунингдек, ҳозирда ваколатли органлар томонидан мактаб директорининг хатти-ҳаракатларида маъмурий ҳуқуқбузарлик аломатлари бор-йўқлиги ўрганилмоқда. Ушбу ҳолат юқори турувчи ва ваколатли органлар томонидан назоратга олинган бўлиб, ўрганиш якунлари бўйича қўшимча маълумот берилади.
Изоҳ (0)