Февраль ойида АҚШ осмонида уриб туширилган Хитой ҳаво шари Американинг бир қатор махфий ҳарбий объектларидан разведка маълумотларини тўплашга улгурган. Бу ҳақда NBC News телеканали АҚШнинг икки юқори мартабали амалдори ва бир собиқ маъмурият ходимига таяниб маълум қилди.
![](/static/2023/surayyo2/large.jpg)
Уларнинг сўзларига кўра, ҳаво шари бир қанча объектлар устидан учиб ўтган (баъзи ҳолларда саккизлик траэктория бўйлаб) ва тўпланган маълумотларни реал вақт режимида Пекинга узатган, деб ёзади телеканал.
Шу билан бирга, АҚШ Мудофаа вазирлиги Хитой ҳаво аппарати реал вақт режимида ХХРга разведка маълумотларини узатишга муваффақ бўлганини ҳали тасдиқлай олмайди. Пентагон вазиятни таҳлил қилишда давом этмоқда, деди Reuters идора матбуот котиби Сабрина Сингхга таянган ҳолда.
Хитой шари бир қатор электрон сигналларни тутиб олган
Разведка маълумотлари асосан қурол тизимларидан ёки база ходимларининг мулоқоти вақтида тутиб олинган электрон сигналлардан иборат эди, лекин унда тасвирлар бўлмаган.
Шу билан бирга, Америка томони бир нечта потенсиал разведка нишонларини ҳаракатга келтирган ва маълум даражада ҳаво шари тизимларининг электр сигналларини тутиб олиш қобилиятини блоклашга муваффақ бўлган, деб ёзади NBC News.
The Washington Post исмини ошкор қилмасликни сўраган бир неча америкалик мулозимларга таяниб, АҚШ ҳарбийлари Хитой ҳаво шари учирилганидан буён унинг йўналишини кузатиб борганини хабар қилганди.
Шар сабаб АҚШ Давлат котиби Хитойга ташрифини бекор қилган эди
Хитой шари бир неча кунлик кузатувлардан сўнг 4 февраль куни Жанубий Каролина қирғоқлари яқинида уриб туширилган эди, у “жосус шар” дея гумон қилинган ва бу воқеа сабаб Вашингтон ҳамда Пекин ўртасидаги шусиз ҳам таранг муносабатлар янада мураккаблашган.
Хусусан, АҚШ Давлат котиби Энтони Блинкен 5 ва 6 февраль кунлари Хитой пойтахтига режалаштирилган ташрифини бекор қилди. Америка дипломатияси раҳбари ўз қарорини “АҚШ ҳаво ҳудудида Хитойнинг юқори баландликдаги разведка ҳаво шарининг мавжудлиги”га муносабат билан изоҳлади.
Хитой раҳбарияти Вашингтон ва АҚШ оммавий ахборот воситаларининг айбловларини “асоссиз спекуляция ва пропаганда” дея рад этиб, воқеа “Хитойни қоралаш учун баҳона” сифатида ишлатилганини айтди. Хитой томонига кўра, ҳаво шари метеорологик мақсадлар учун махсус ишлаб чиқилган фуқаролик объекти бўлган ва АҚШ ҳаво ҳудудига тасодифан кириб қолган.