Ўзбекистонда 2023 йилнинг декабрь ойига қадар юзлаб, минглаб тадбиркорлар “кўча” зўравонлигига учраган, таҳдидлар қурбони бўлган. Натижада миллиардлаб даромад келтирадиган бизнесидан ажралган. Ўша йили “кўча” фаолиятига чек қўйилгач, жабрдийда тадбиркорлар юрак ютиб, ҳуқуқни муҳофаза қилувчи органларга шикоят қилган.
“Дарё” ана шундай кўча зулмидан азият чекиб, бизнесидан ажралган тадбиркор Мурод Тўхтаев билан суҳбатлашди.
Тадбиркорнинг тушунтиришича, у бизнесдаги ҳамкори Собир Исомуҳаммедов билан 2005 йилда печене завод ташкил этган бўлиб, заводнинг даромади миллиардларга етганда ўзаро келишмовчилик юзага келган. Дастлаб заводдан ҳайдалган Мурод Тўхтаев 2022 йили “кўча” номи билан танилган Саидазиз Саидалиев талаби билан ҳужжатдан ҳам ўчирилиши керак бўлган. Бироқ айрим сабабларга кўра, ҳужжат ишлари тўхтаб қолган.
2022 йили кунларнинг бирида бизнесдаги ҳамкорим Собир Исомуҳаммедов Миробод туманидаги офисига чақирди. Кечки пайт соат 8 да борсам, офисга киришим билан менга дўқ қилиб, бизнесдаги улушимдан воз кечишим кераклигини, менинг даромадга умуман ҳаққим йўқлигини айтиб, “осонликча улушингдан кеч”, деди. Агар кечмайдиган бўлсам, улушимни Саидазиз ёрдамида мендан тортиб олишини маълум қилди. Бир оздан сўнг ёнимизга кириб келган Саидазиз ва унинг йигитлари улушимдан ўз хоҳишим билан воз кечишим кераклигини, эртадан бошлаб завод уники эканини айтди. Менга дўқ қилди. Ўлдириб юборишини таъкидлади.
Собир ака Саидазизга “бунга кечаги жойни кўрсат” дегач, Саидазиз ва унинг шериклари мени олтинча қават деразаси ёнига олиб боришди. Агар бизнесдаги улушимдан воз кечмасам, икки қўлим ва бошимни деразадан чиқариб, шу ердан ташлаб юборишларини, ўлдиришларини билдирди. Мен эса қўрққанимдан “хўп, улушимни бераман” дедим. Эртасига нотариусга бориб, қўл қўйиб беришга рози бўлдим ва ярим кечаси соат иккида уйимга қайтдим, — дейди тадбиркор.
Жабрланувчининг билдиришича, бу воқеага унинг жияни Алишер ва Фаррух исмли ҳисобчиси гувоҳ бўлган.
Ўша куни Фаррух исмли ҳисобчимизни ҳам чақиртиришди. 2009 йилдан 2022 йилгача бўлган барча ҳисоб-китобларни кўрсатдик. Шунга қарамасдан Фаррухга ҳам босим қилишди, қўрқитишди. Ўша кунги воқеаларга жияним Алишер ва Фаррух гувоҳ. Бизни ярим кечаси соат иккигача ушлаб ўтиришди. Кейин эртаси куни нотариусга бориб, улушимни ўтказиб беришни ваъда қилиб, уйга қайтдик, — дейди суҳбатдош.
Мурод Тўхтаевнинг айтишича, улар уйга қайтаётган пайтда милицияга мурожаат қилмаслик ҳақида огоҳлантирилган.
“Милицияга бормагин, ҳамма жойда менинг кўз-қулоғим бор. Агар бирор жойга бориб, шикоят қилсанг ўзингдан кўр”, деб қўрқитишди, — дейди у.
Кўча зулмидан қутилган тадбиркор ўша куни тонгда Фарғона вилоятига жўнаб кетган.
Ишлар сал тинчисин дедим, қолаверса улардан қўрққаним учун Фарғонага жўнаб кетдим. Йўлда кетаётсам, телефон қилишди ва кечаги гап ҳалиям кучда дейишди. Такрор-такрор телефон қилишгач, эртаси куни Тошкентга қайтиб келдим. Келишим билан офисимга Азиз ва Жамшид исмли болалар келиб, ҳужжатлар тайёр эканини қўл қўйиб берсам етарли бўлишини билдиришди. “Агар қўл қўймасанг, Собир Исомуҳаммедов ва Саидазизлар сенга ёмон бўлишини такрорлашди. Ўлдирамиз” дейишди, — дейди тадбиркор.
Мурод Тўхтаевнинг айтишича, Жиноят ишлари бўйича Юнусобод туман судида 2024 йилнинг 14 июнь куни Саидазиз Саидалиев ва икки нафар кишининг унга нисбатан қилган хатти-ҳаракатлари учун яна бир суд иши бошланган. Суд иши доирасида Саидазиз Саидалиев Жиноят кодексининг 165-модда 3-қисми “а” банди, “в” банди (товламачилик), Собиржон Исомуҳаммедов 165-модда 3-қисми “а” банди, “в” банди (товламачилик), 168-модда 3-қисми “а” банди, “б” банди (фирибгарлик), 168-модда 3-қисми “а” банди (фирибгарлик) ҳамда Мирсолих Мирхўжаев 165-модда 3-қисми “а” банди, “в” банди (товламачилик) билан айбланмоқда.
Бугунги кунларда давом этаётган судда Саидазиз ва ёнидаги йигитлари суд қилинмоқда. Улар буюртмани бажаргани учун жавоб беряпти. Лекин буюртмачи очиқда юрибди-ку. Тағинам гаров эҳтиёт чораси қўлланилган бўлса-да, масъул ташкилотлар хабардор қилинмаган ҳолда ҳаж сафарига жўнаб кетибди. Зоир деган бола гувоҳ бўлиб ўтибди. Асад деган бола умуман кўринмаяпти. Улар ҳам ўша куни воқеанинг асосий иштирокчиси бўлган-ку. Собир Исомуҳаммедов ҳаж сафарида юрганини исботлаш учун менга расм ташлаб юборибди. Қўлингдан нима келади деб, — дейди тадбиркор.
Тадбиркор Мурод Тўхтаевнинг қўшимча қилишича, Собир Исомуҳаммедов билан 2005 йилда бошлаган шериклик асосидаги тадбиркорлик фаолияти дастлаб ривожланмай, банкротлик ёқасига келган. Бизнес йиллар ўтиб, ўзини оқлаб, даромад келтира бошлаган. Бўш турган биноси ва мавжуд эски дастгоҳларини берган улушдор Собир Исомуҳаммедов даромад кела бошлагач, шериги Мурод Тўхтаевни уни алдаётганликда, асосий даромадни еб кетишда айблаган. Дин пешвосининг олдига олиб бориб, бизнес бошланишига катта ҳиссаси борлигини айтиб, ҳақдорлиги борасида сўраган. Шунда ҳам кўнгилдагидек жавоб ололмагач, шеригига МЧЖ ташкил этиб, тенг улушдор сифатида ишлашни таклиф қилган. Кўп ўтмай, яна ғирром йўлни танлаб, печене заводининг оёққа туришига сабабчи бўлган тадбиркорни “ўйиндан чиқариш”га уринган. Алалоқибат 2019 йилдан бошлаб, шериги Мурод Тўхтаевни заводга ҳам киритмай қўйган. Ва шу кунга қадар у ўз мулкига эгалик қилолмаяпти.
Изоҳ (0)