АҚШ Шимолий қўмондонлигининг қирувчи самолётлари аввалроқ мамлакат ҳаво ҳудудида аниқланган Хитой шарини уриб туширди, деб хабар бермоқда CNN.
Шар Жанубий Каролина қирғоқлари яқинида Атлантика океани устида парвоз қилаётган пайт унга қарата ракета учирилди. Операция бошланишидан аввал АҚШ Федерал авиация бошқармаси Шимолий ва Жанубий Каролинадаги учта аэропортнинг фаолиятини вақтинча тўхтатди.
Пентагоннинг таъкидлашича, АҚШ президенти Жо Байден Хитой шарини уриб туширишни 1 февраль куни буюрган, бироқ Мудофаа вазирлиги хавфсизлик нуқтаи назаридан ҳаво шари АҚШнинг сувли ҳудуди устидан ўтишини кутган.
Ҳарбий вазирликнинг даъво қилишича, Хитой шардан Қўшма Штатлардаги стратегик объектларни кузатиш учун фойдаланган. ХХР эса ҳаво шари метеорологик мақсадларда учирилганини иддао қилмоқда.
Хитой Ташқи ишлар вазирлиги “АҚШнинг фуқаролик учувчисиз учар шарга ҳужум учун куч ишлатганидан” норозилик билдирди. “Хитой текширувдан сўнг Америка томонини бир неча бор ҳаво шаридан фуқаролик мақсадларида фойдаланилгани ва форс-мажор ҳолатлари туфайли у АҚШ ҳаво ҳудудига кириб қолгани тўғрисида огоҳлантирганди, бу мутлақо кутилмаган ҳолат”, — дейилади ТИВ баёнотида. Дипломатларнинг қўшимча қилишича, ХХР кейинги зарур жавоблар бериш ҳуқуқини ўзида сақлаб қолади ва ўзининг қонуний ҳуқуқ ва манфаатларини қатъий ҳимоя қилади.
Изоҳ (0)