Буркина-Фасо ҳудудидаги ҳарбий базага 11 июнь куни уюштирилган ҳужум оқибатида 100 нафардан ортиқ аскар ҳалок бўлган. Бу ҳақда маҳаллий манбаларга таяниб, BBC хабар берди.
Манбада айтилишича, 2022 йилда ҳарбийлар ҳокимиятга келган мамлакатда сўнгги бир неча ойда хавфсизлик билан боғлиқ вазият ёмонлашган. Ҳарбийлар ўртасида мунтазам равишда тўқнашувлар юз берган.
Буркина-Фасо ҳукумати бир неча йилдан бери диний радикал гуруҳларга қарши курашиб келади. Бугунги кунда ҳам мамлакатнинг қарийб ярми ҳукумат назоратидан ташқарида ҳисобланади.
11 июнь куни Мансила шаҳридаги ҳарбий базага уюштирилган ҳужумда ҳам ҳарбий хунта диний гуруҳларни айблаган. “Жамоат нусрат ал-Ислом вал-муслимин” (ЖНИМ) эктремистик гуруҳи теракт ортида тургани эълон қилинган.
Мансилага ҳужумда 100 га яқин аскар ҳалок бўлгани тасдиқланган. Аскарлар ҳукумат терговидан сўнг оилаларига топширилган.
12 июнь куни Буркина-Фасо Марказий давлат телевидениеси штаб-квартираси ёнида ҳам портлаш юз берган. Бунинг оқибатида 10 га яқин киши жароҳатланган. Ҳалок бўлганлар ҳақида маълумот йўқ.
Теракт уюштиришда айбланган “Жамоат нусрат ал-Ислом вал-муслимин” гуруҳи “Ал-Қоида”нинг бўлими сифатида қаралади. Мавжудлиги асосан Марказий Африка минтақасида бўлган бу тузилма террорчи бирлашма дея эътироф этилган.
Бурника-Фасонинг амалдаги раҳбари Капитан Иброҳим Траоре терактдан кейин ҳукумат махсус операция бошлаганини билдирган. Ҳужум ортидан Мансила шаҳарчасини тарк этган аҳолини қидириш бўйича ҳам тадбирлар ташкил этилган
Ғарб нашрлари ҳарбий базага ҳужум ҳукумат ичидаги унга мухолиф кучлар томонидан амалга оширилганини билдирган. Агар бу тасдиқланса, Траоре бошчилигидаги ҳарбий хунтага қарши мамлакатда исён кўтарилгани аён бўлади.
Буркина-Фасода ҳозирда барча давлат муассасалари ва ОАВ назоратга олинган. Ҳукумат фаолияти ҳақида тасдиқланмаган маълумот тарқатишга қатъий чеклов қўйилган.
Изоҳ (0)