Америка космик агентлиги NASA 2024 йилда Артемис-2 миссияси доирасида Ой атрофида учиши кутилаётган тўрт нафар астронавтнинг исмларини эълон қилди.
NASA сайтидаги хабарга кўра, Ой миссияси экипажига уч нафар америкалик — Кристина Кох, Виктор Гловер ва Рид Уайсмен ҳамда бир нафар канадалик Жереми Хансен кирди.
Чапдан ўнгга: Кристина Кох, Рид Уайсмен (ўтирган), Виктор Гловер ва Жереми Хансен
NASA ушбу тўрт астронавт 50 йилдан кўпроқ вақт ичида Ойга учадиган биринчи одамлар бўлишини таъкидлади. Бундан ташқари, Ой миссияси экипажи биринчи марта аёл кишидан, афроамерикалик ва канадалик астронавтлардан иборат бўлади, деб қўшимча қилди космик агентлик.
Ойга парвоз 2024 йилнинг ноябрь ойидан олдин амалга оширилади. Артемис-2 миссияси ўн кун давом этиши кутилмоқда. Учиришдан сўнг SLS (Space Launch System) космик ракетасининг иккинчи босқичи Orion космик кемасини эллиптик орбитага олиб чиқади, орбита Ердан 2 900 километргача баландликдан ўтган, деб ёзади The New York Times. Кейин Orion Ойга яқинлашади, лекин унинг орбитасига кирмайди, аксинча, Ойнинг тортишиш кучидан фойдаланиб, Ерга қайтади.
2022 йил декабрида Артемис-1 миссияси якунланган эди, унинг давомида Orion космик кемаси синов режимида учувчисиз Ойга учиб, унинг орбитасида бир неча ҳафта бўлди ва Ерга қайтди.
Артемис-3 миссияси 2025 йилдан олдин амалга оширилади, унинг давомида астронавтлар Ой юзасига қўнишни режалаштирмоқда.
Изоҳ (0)