Бугун ҳар бир ҳудуд улкан қурилиш майдонига айланган. Ҳар қадамда янги-янги турар жойлар, ижтимоий-маданий ва ишлаб чиқариш объектлари каби бир-биридан мустаҳкам ва кўркам иморатлар барпо этилмоқда. Аҳамиятли томони эса, ушбу жараён қурилиш материаллари саноатининг жадал ривожланишига туртки бермоқда.
Жорий йилнинг 20 июнь куни Ўзсаноатқурилишбанк томонидан Самарқанд вилоятидаги йирик қурилиш материаллари ишлаб чиқарувчи корхона — “Азия металл проф” масъулияти чекланган жамиятига уюштирилган пресс турда тармоқда амалга оширилган ислоҳотларнинг самараларини ўз кўзлари билан кўришди.
– Заводимизнинг илк фаолияти 2018 йилда ўрамали металлдан турли ўлчамдаги металл қувурлар ва профиллар тайёрлаш билан бошланган, – дейди “Азия металл проф” МЧЖ раҳбари Рустам Шаропов. – Шундан сўнг бугунги кунгача маҳаллий ва ташқи бозор талабидан келиб чиқиб яна 3 та йирик лойиҳани ишга туширдик.
Корхона томонидан 2018-2022 йилларда хитойлик ҳамкорлар билан биргаликда умумий қиймати 110 млн. долларлик лойиҳалар амалга оширилган. Мазкур маблағларнинг 33 млн. доллари тўғридан-тўғри хорижий инвестициялар, 81 млн. доллари эса, Ўзсаноатқурилишбанк томонидан ажратилган кредитлардир.
Корхонага тегишли иккинчи босқичдаги ишлар 2021 йилда йўлга қўйилган. Унга кўра йилига 120 минг тонна ўрамали металлдан турли қалинликдаги рух ва полимер қопламали тунука ишлаб чиқарилмоқда.
2022 йилдан бошлаб корхона маҳсулотлари ассортиментига иссиқ ўрамали металл листлар ва қурилиш учун профиллар ҳам қўшилган. Йилига 390 минг тонна арматура қуйиш қуввати эса яқин кунларда ишга туширилади.
Ўтга, сувга бардошли металл маҳсулотларининг барчаси илғор технологиялар асосида атроф-муҳитга зарар етказмаган ҳолда ишлаб чиқарилмоқда.
Қайд этилишича, ўтган йили корхона томонидан 3 трлн. 444 млрд. сўмлик саноат маҳсулотлари ишлаб чиқарилган бўлса, шундан 52,1 млн. долларлик қисми Польша, Белоруссия, Россия, Қозоғистон, Тожикистон, Қирғизистон каби давлатларга экспорт қилинган.
Пресс-турда журналистлар Президентимизнинг ўтган йил ушбу корхонага ташрифида белгилаб берилган вазифалар ижроси юзасидан ҳам маълумотга эга бўлди.
Хусусан, у ерда маҳаллийлаштириш ва таннархни тушириш орқали экспортда рақобатбардошликни ошириш чоралари кўрилаётгани таъкидланди.
Корхонанинг навбатдаги ойна ишлаб чиқариш борасидаги лойиҳасини тадбиқ этишда ҳам шу жиҳатларга алоҳида эътибор қаратилмоқда. Бунинг учун жами 120 млн. доллар йўналтирилади, 250 та янги иш ўрни барпо этилади.
Пресс-тур доирасида Самарқанд вилоятида қурилиш материаллари ишлаб чиқаришни ривожлантиришда Ўзсаноатқурилишбанк томонидан олиб борилаётган ишлар кўламига бағишланган брифинг ҳам ўтказилди.
– Сўнгги беш йилда қурилиш материаллари соҳасида кўплаб инновацион лойиҳалар тадбиқ этила бошлади, янги технологиялар фаол кириб келмоқда., – дейди “Ўзсаноатқурилишбанк” АТБнинг Самарқанд вилояти ҳудудий бошқармаси бошлиғи ўринбосари Жасур Нуруллаев. – Хусусан, вилоятимизда ҳам ушбу тармоқда сўнгги 3 йилда 207 та янги корхона ташкил этилди, 50дан зиёд лойиҳа маҳаллийлаштирилди. Уларнинг ўнга яқини банкимиз томонидан молиялаштирилди. Натижада, импорт ўрнини босадиган маҳсулотлар ишлаб чиқариш ҳажми сезиларли даражада ортди, валюта захираларини тежашга, экспортни ривожлантиришга эришилди. Тармоқда 5700 та иш ўрни яратилди.
Дарҳақиқат, “Азия металл проф” вилоятда энг кўп иш ўрни барпо этган корхоналар сирасига киради. Бугунги кунда у ерда 700дан зиёд ишчи меҳнат қилмоқда.
Реклама ҳуқуқи асосида.
Изоҳ (0)