Евро—2024 мусобақасининг 1-тур учрашувлари ўз якунига етди. Ушбу тур бир нечта кутилмаган натижалар ва жароҳатлар билан ёдда қолди.
Бельгиянинг кутилмаган мағлубияти ва Лукакунинг бекор қилинган икки голи
Бельгия терма жамоаси ҳужумчиси Ромелу Лукаку учун Евро—2024 мусобақасининг бошланиши ЖЧ—2022 турнирининг давомидек туюлди.
Бельгияликлар сенсацион тарзда Словакияга 0:1 ҳисобида мағлуб бўлди ва миллий жамоанинг марказий ҳужумчиси Лукакунинг рақиб дарвозасида ҳеч ҳам омади келмади.
Лукаку Европа чемпионатлари тарихидаги бир ўйинда иккита голи бекор бўлган илк футболчига айланди.
Аввалига Ромелу томонидан киритилган гол ҳужумчининг офсайдда қолгани, кейинги голи эса голли узатма берган Луа Опенданинг қўли тўпга теггани сабаб бекор қилинди. Бельгиялик мураббий Доменико Тедеско Бельгия терма жамоаси билан биринчи марта мағлубиятга учради.
Руминия жамоасининг Украина устидан йирик ҳисобдаги ғалабаси
Украина термаси Руминия билан ўйинда фаворит ҳисобланаётган эди, аммо 0:3 ҳисобида сенсацион ҳисобда мағлубиятга учради. “Реал Мадрид” дарвозабони Андрей Лунин ўзининг энг ёмон ўйинларидан бирини ўтказди, айниқса иккинчи голда дарвозабон ишончсиз ўйнади.
Таркибида юлдуз футболчилари йўқ руминлар кучли футбол намойиш этди. Александр Зинченко ўйиндан сўнг ўз фикрини билдириб ўтди.
Мен нима дейишни билмайман. Мухлислар кўзига қараш жуда уятли... Биринчи ўйин жуда муҳим эканини барча тушунди, лекин афсуски, ушбу мағлубият содир бўлди.
Биринчи турнинг энг чиройли ўйини ва “Реал Мадрид” иқтидорининг муҳим голи
Туркия ва Грузия терма жамоалари, кўпчиликнинг фикрига кўра, Евро—2024 турнири 1-турининг энг томошабоп ўйинини ўтказди. Италиялик Винченсо Монтелла ва франциялик Вилли Санол жамоалари тўртта гол урди.
Турклар учун муҳим иккинчи голни “Реал Мадрид”нинг ёш истеъдоди Арда Гюлер киритди. Ҳужумкор ярим ҳимоячи жарима майдончаси ташқарисидан юқори бурчакка ажойиб айланма зарба берди. Дарвозабон Мамардашвили бу вазиятда ожиз қолди. Сўнгги дақиқаларда бутун жамоа билан ҳужумга ўтган Грузия қўшиб берилган дақиқаларда жазоланди. Якуний ҳисоб — 3:1.
Германия термасининг очилиш ўйинидаги йирик ҳисобдаги ғалабаси
Евро—2024 нинг биринчи ўйини бир нечта рекордларни тақдим этди. Биринчидан, очилиш учрашуви бунчалик йирик ҳисоб билан якунланмаган эди. Ушбу ўйинда немислар шотландлар устидан йирик ҳисобда ғалаба қозонди — 5:1. Бундан ташқари, Германия терма жамоасини бошқараётган Юлиан Нагелсманн Европа чемпионатлари тарихидаги энг ёш мураббийга айланди. Ўйин куни у 36 ёш-у 327 кунлик эди.
Дастлабки икки голни Флориан Вирц ва Жамол Мусиала киритди. Ва улар яна бир натижани қайд этди — Евро тарихида биринчи марта 22 ёшгача бўлган икки футболчи бир ўйинда гол муаллифларига айланди.
Португалиянинг қийин ғалабаси, Роналдудан тўлиқ ўйин
Криштиану Роналду ва унинг жамоаси 2016 йилги натижани такрорлаш учун биринчи қадамни қўйди. Португалия терма жамоаси Европа чемпионатини чехлар устидан қозонилган иродали ғалаба билан бошлади. Катта устунликка эга бўлган португаллар бир соатлик ўйиндан сўнг гол ўтказиб юборди. Робин Граначнинг автоголи эвазига ҳисоб тенглашди. Бир оз ўтиб Португалия яна гол урди. Роналду офсайдда қолгани сабаб бу гол бекор қилинди.
Чехия терма жамоаси қўшиб берилган дақиқаларгача дуранг натижани ушлаб қолишга ҳаракат қилди. Бироқ Чико Консейсао бунга рози бўлмади ва қўшиб берилган дақиқаларнинг иккинчисида ғалаба тўпини киритди.
Бу ўйинда Роналду ўзининг 6-мусобақасини ўтказди, Пепе эса мусобақада иштирок этаётган энг кекса футболчига айланди.
Франция терма жамоаси юлдузи Килиан Мбаппенинг бурни синди
Франция терма жамоаси Европа чемпионатини Австрия устидан қозонилган ғалаба билан бошлади – 1:0. Австрияликлар мағлубиятига сабаб бўлган ягона голни ўзлари киритди. “Реал” клубининг янги футболчиси Мбаппе бурнини синдириб олди.
Ҳужумчи австриялик ҳимоячи Кевин Дансо билан тўқнашувда жароҳат олди. Мбаппе учун синган бурнини ҳимоя қиладиган ниқоб тайёрланади.
Текширув натижаларига кўра, Килиан жарроҳлик амалиётини ўтказмасликка қарор қилган, аммо у гуруҳ босқичининг 2 ва 3-турларини ўтказиб юборади.
Энг зерикарли ўйин намойиш этган Англия жамоасидан зарбалар бўйича антирекорд
Евро—2024 мусобақасининг 1-турида Англия термаси таркибда энг яхши футбол юлдузларини тўпланганига қарамай, Гарет Саутгейт бошчилигидаги жамоа биринчи турдаги энг зерикарли ўйинни кўрсатди. Серблар дарвозасига гол урган инглизлар ҳисобни сақлаб қолиш учун ўйнай бошлади ва ўз мақсадига эришди.
Аммо бундай ўйинда ўтган мавсумда Премьер Лиганинг энг яхши ўйинчиси Фил Фоден ва Германия чемпионати етакчи ўйинчиларидан бири Ҳарри Кейн ҳам танаффусга қадар тўпга бор-йўғи икки марта тўпга тегинди. Шу маълумот ҳам футбол ватани — Англия термасининг нақадар ҳимоявий ва зерикарли ўйин кўрсатганининг яққол исботи ҳисобланади.
Opta Спорт статистик сайти маълумотларига кўра, Сербия ва Англия терма жамоалари ўртасидаги ўйинда дарвоза томон 11 та зарба берди. Ушбу натижа 1980 йилдан бери Европа чемпионатидаги энг ёмон натижа саналади.
- Европа чемпионатининг иккинчи тур учрашувларига бугун, 19 июнь санасидан старт берилади ва жамоаларда кейинги босқич масаласини ҳал қилиш имкони мавжуд.
Изоҳ (0)