Fevral oyida AQSH osmonida urib tushirilgan Xitoy havo shari Amerikaning bir qator maxfiy harbiy obyektlaridan razvedka ma’lumotlarini to‘plashga ulgurgan. Bu haqda NBC News telekanali AQSHning ikki yuqori martabali amaldori va bir sobiq ma’muriyat xodimiga tayanib ma’lum qildi.
Ularning so‘zlariga ko‘ra, havo shari bir qancha obyektlar ustidan uchib o‘tgan (baʼzi hollarda sakkizlik traektoriya bo‘ylab) va to‘plangan maʼlumotlarni real vaqt rejimida Pekinga uzatgan, deb yozadi telekanal.
Shu bilan birga, AQSH Mudofaa vazirligi Xitoy havo apparati real vaqt rejimida XXRga razvedka ma’lumotlarini uzatishga muvaffaq bo‘lganini hali tasdiqlay olmaydi. Pentagon vaziyatni tahlil qilishda davom etmoqda, dedi Reuters idora matbuot kotibi Sabrina Singxga tayangan holda.
Xitoy shari bir qator elektron signallarni tutib olgan
Razvedka ma’lumotlari asosan qurol tizimlaridan yoki baza xodimlarining muloqoti vaqtida tutib olingan elektron signallardan iborat edi, lekin unda tasvirlar bo‘lmagan.
Shu bilan birga, Amerika tomoni bir nechta potensial razvedka nishonlarini harakatga keltirgan va ma’lum darajada havo shari tizimlarining elektr signallarini tutib olish qobiliyatini bloklashga muvaffaq bo‘lgan, deb yozadi NBC News.
The Washington Post ismini oshkor qilmaslikni so‘ragan bir necha amerikalik mulozimlarga tayanib, AQSH harbiylari Xitoy havo shari uchirilganidan buyon uning yo‘nalishini kuzatib borganini xabar qilgandi.
Shar sabab AQSH Davlat kotibi Xitoyga tashrifini bekor qilgan edi
Xitoy shari bir necha kunlik kuzatuvlardan so‘ng 4-fevral kuni Janubiy Karolina qirg‘oqlari yaqinida urib tushirilgan edi, u “josus shar” deya gumon qilingan va bu voqea sabab Vashington hamda Pekin o‘rtasidagi shusiz ham tarang munosabatlar yanada murakkablashgan.
Xususan, AQSH Davlat kotibi Entoni Blinken 5 va 6-fevral kunlari Xitoy poytaxtiga rejalashtirilgan tashrifini bekor qildi. Amerika diplomatiyasi rahbari o‘z qarorini “AQSH havo hududida Xitoyning yuqori balandlikdagi razvedka havo sharining mavjudligi”ga munosabat bilan izohladi.
Xitoy rahbariyati Vashington va AQSH ommaviy axborot vositalarining ayblovlarini “asossiz spekulyatsiya va propaganda” deya rad etib, voqea “Xitoyni qoralash uchun bahona” sifatida ishlatilganini aytdi. Xitoy tomoniga ko‘ra, havo shari meteorologik maqsadlar uchun maxsus ishlab chiqilgan fuqarolik obyekti bo‘lgan va AQSH havo hududiga tasodifan kirib qolgan.
Izoh (0)