Самарқандда уч киши банкоматни ўмармоқчи бўлди (видео)

Самарқандда банкоматни ўмармоқчи бўлган уч киши қўлга олинди. Бу ҳақда вилоят ИИБ матбуот хизмати хабар қилди.

31 март куни тунги соат 03:00 лар атрофида уч нафар номаълум шахс юзларини тиббий ниқоб билан беркитган ҳолда давлат рақам белгиси бўлмаган қора Chevrolet Tracker машинасида Самарқанд шаҳар Буюк Ипак йўли кўчаси 65-уйнинг олдида ўрнатилган Аксионерлик тижорат “Turonbank” Самарқанд вилоят филиалига тегишли бўлган банкоматни ўмармоқчи бўлган.

Фуқаролар пластик карталаридаги пулларини нақд қилиб бериш учун хизмат кўрсатувчи ушбу банкомат шохобчасига келиб, банкоматни электр қувватидан узган ва бузиш йўли билан банкомат ичида бўлган 323 миллион 290 минг сўм нақд пулларни яширин равишда талон-торож қилмоқчи бўлган.

Шу вақтда банкоматнинг тармоқдан узилгани ҳақидаги сигнали ишга тушиб кетган. Натижада Самарқанд шаҳар Қўриқлаш бўлимига берилган огоҳлантирувчи чақирув асосида ходимлар воқеа жойига етиб келган.

Хизмат машинасининг огоҳлантирувчи товушларини эшитган ушбу фуқаролар ўғирлик жиноятини охирига етказа олмасдан, ҳодиса жойидан яширинган.

Самарқанд шаҳри бўйича ИИО ФМБ ходимларининг тезкор қидирув-суриштирув ишлари натижасида уларнинг учаласи ҳам қўлга олинган.

Ҳолат юзасидан Жиноят кодексининг 25-моддаси (жиноятга тайёргарлик кўриш ва жиноят содир этишга суиқасд қилиш) 169-моддаси 4-қисми (бир гуруҳ шахслар томонидан олдиндан тил бириктириб ўғрилик содир этиш) билан жиноят иши қўзғатилиб, тергов ҳаракатлари олиб борилмоқда.