Баландлик, зилзила, самолётда учиш: ўзбек шоу-бизнеси вакилларининг фобиялари (видео)

Қўрқув ҳисси ҳар кимда бор. Унинг юзага келишига кўп нарсалар сабаб бўлиши мумкин. Фобияни енгиш эса қийин масала. “Севимли” телеканалининг “Машҳурлар” кўрсатувида ўзбек шоу-бизнесининг айрим вакиллари ўз фобиялари ҳақида гапириб берди.

Муножот Йўлчиева сувдан қўрқади

“Мен сувдан қўрқаман. Денгизда ёки бошқа жойда чўмилганда қўрқув бўлади. 21 ёшимда Қора денгизга дам олишга юборишган, ўша пайтда умуман сузишни билмаганман. Опам билан дам олаётгандим. Муножот юринг, ўша белги қўйилган жойгача сузиб борамиз, дейишди. Улар сузишни билмаслигимни билишмасди. Қирғоқда сузганимга улар бемалол сузиб юрибди, деб ўйлашди.

Ўша белгигача бордик. Пастга қарасам, сувнинг тубида сув ўтлари кўринди — чўкиб кетишим мумкин, деган қўрқув бошланди. Қайтаётган вақтимиз бир-биримизга яқин суздик, оёқларим бир-бирига тегиб, тикка бўлиб қолдим. Пастга қараб тушиб кетдим. Улар мени қутқаришга ҳаракат қилишади, мен бир сувдан чиқиб, яна чўкиб кетдим. Икки-уч марта шунақа бўлганидан кейин бемалол сузиб қирғоққа чиқдик”, — дейди хонанда.

Муқаддас Холиқова зилзиладан қўрқади

“Мен зилзиладан қўрқаман. Хаёлимга ҳозир зилзила бўлса нима қиламан, деган ваҳималар келиб қолади. 1966 йилда зилзилани кўрганман, ўша пайтда 6 ёшда эдим. Ер гумбурлагани ҳеч эсимдан чиқмайди. Онам мени кўтариб ҳовлига чиққан. Менимча, бу ўшанинг қўрқуви бўлса керак”, — деб ёдга олди актриса.

Ҳилола Ҳамидова самолётда учиш ва зилзиладан қўрқади

“Самолётда учганим сари ўзимда шу фобияни босяпман. Шу билан бирга зилзиладан ҳам қўрқаман. Ҳар куни кечқурун шифтга қараб, шу нарсани эслаб оламан. Ҳаётимда катта зилзилани кўрмаганман, лекин қанақадир уни сезаман”, — дейди хонанда.

Зуҳра Солиева кўп инсонлар ичида нафаси қисишидан қўрқади

“Мен кўп инсонларнинг ичида нафасим қисишидан қўрқаман. Самарқандга кўчиб юрадиган цирк келган. Циркда одам кўп бўлган. Унга кирганимизда жой тиқилинч эди, жуда қўрққанман. Бунинг устига ёз пайти бўлган, жуда чанқаганмиз. Ариқ сувини 10 тийиндан сотишган, чанқаганимиздан ўшани сотиб олиб ичганмиз. Шундан кейин умуман циркка қизиқмайдиган бўлдим”, — дейди болалик хотираларини эслаган актриса.

Ёрқинхўжа Умаров баландликдан қўрқади

“Ёшлигимда томга чиққанимда баланд панжарали жой турган экан. Баландликдан яхшигина қўрққанман. Нима сабабдан бундан қўрқишимни билмайман, баландликдан пастга қараган пайтим юрагим тортиб кетади”, — дейди хонанда.

Мафтуна Шокирова сувдан қўрқади

“Сувдан, чўкиб кетишдан роса қўрқаман. Сузишни билмайман. Биз чўмилгани оқар сувга борардик. Бир марта оилавий борганмиз, онам балонда эди, мен эса уни орқасида бўлганман. Онам чўккан, ўзларини қутқарган пайт мен эсидан чиқиб кетганман. Қўрқиб чирмашганимдан кейин эсларига келдим. Ўша вақтда ўзимни ўзим қутқарганман”, — дейди инстаблогер, актриса Мафтуна Шокирова.

Бунёдбек Саидов касал бўлишдан қўрқади

“Мен охирги пайтларда касал бўлишдан қўрқаман”, — дейди хонанда.