Balandlik, zilzila, samolyotda uchish: o‘zbek shou-biznesi vakillarining fobiyalari (video)

Qo‘rquv hissi har kimda bor. Uning yuzaga kelishiga ko‘p narsalar sabab bo‘lishi mumkin. Fobiyani yengish esa qiyin masala. “Sevimli” telekanalining “Mashhurlar” ko‘rsatuvida o‘zbek shou-biznesining ayrim vakillari o‘z fobiyalari haqida gapirib berdi.

Munojot Yo‘lchiyeva suvdan qo‘rqadi

“Men suvdan qo‘rqaman. Dengizda yoki boshqa joyda cho‘milganda qo‘rquv bo‘ladi. 21 yoshimda Qora dengizga dam olishga yuborishgan, o‘sha paytda umuman suzishni bilmaganman. Opam bilan dam olayotgandim. Munojot yuring, o‘sha belgi qo‘yilgan joygacha suzib boramiz, deyishdi. Ular suzishni bilmasligimni bilishmasdi. Qirg‘oqda suzganimga ular bemalol suzib yuribdi, deb o‘ylashdi.

O‘sha belgigacha bordik. Pastga qarasam, suvning tubida suv o‘tlari ko‘rindi — cho‘kib ketishim mumkin, degan qo‘rquv boshlandi. Qaytayotgan vaqtimiz bir-birimizga yaqin suzdik, oyoqlarim bir-biriga tegib, tikka bo‘lib qoldim. Pastga qarab tushib ketdim. Ular meni qutqarishga harakat qilishadi, men bir suvdan chiqib, yana cho‘kib ketdim. Ikki-uch marta shunaqa bo‘lganidan keyin bemalol suzib qirg‘oqqa chiqdik”, — deydi xonanda.

Muqaddas Xoliqova zilziladan qo‘rqadi

“Men zilziladan qo‘rqaman. Xayolimga hozir zilzila bo‘lsa nima qilaman, degan vahimalar kelib qoladi. 1966-yilda zilzilani ko‘rganman, o‘sha paytda 6 yoshda edim. Yer gumburlagani hech esimdan chiqmaydi. Onam meni ko‘tarib hovliga chiqqan. Menimcha, bu o‘shaning qo‘rquvi bo‘lsa kerak”, — deb yodga oldi aktrisa.

Hilola Hamidova samolyotda uchish va zilziladan qo‘rqadi

“Samolyotda uchganim sari o‘zimda shu fobiyani bosyapman. Shu bilan birga zilziladan ham qo‘rqaman. Har kuni kechqurun shiftga qarab, shu narsani eslab olaman. Hayotimda katta zilzilani ko‘rmaganman, lekin qanaqadir uni sezaman”, — deydi xonanda.

Zuhra Soliyeva ko‘p insonlar ichida nafasi qisishidan qo‘rqadi

“Men ko‘p insonlarning ichida nafasim qisishidan qo‘rqaman. Samarqandga ko‘chib yuradigan sirk kelgan. Sirkda odam ko‘p bo‘lgan. Unga kirganimizda joy tiqilinch edi, juda qo‘rqqanman. Buning ustiga yoz payti bo‘lgan, juda chanqaganmiz. Ariq suvini 10 tiyindan sotishgan, chanqaganimizdan o‘shani sotib olib ichganmiz. Shundan keyin umuman sirkka qiziqmaydigan bo‘ldim”, — deydi bolalik xotiralarini eslagan aktrisa.

Yorqinxo‘ja Umarov balandlikdan qo‘rqadi

“Yoshligimda tomga chiqqanimda baland panjarali joy turgan ekan. Balandlikdan yaxshigina qo‘rqqanman. Nima sababdan bundan qo‘rqishimni bilmayman, balandlikdan pastga qaragan paytim yuragim tortib ketadi”, — deydi xonanda.

Maftuna Shokirova suvdan qo‘rqadi

“Suvdan, cho‘kib ketishdan rosa qo‘rqaman. Suzishni bilmayman. Biz cho‘milgani oqar suvga borardik. Bir marta oilaviy borganmiz, onam balonda edi, men esa uni orqasida bo‘lganman. Onam cho‘kkan, o‘zlarini qutqargan payt men esidan chiqib ketganman. Qo‘rqib chirmashganimdan keyin eslariga keldim. O‘sha vaqtda o‘zimni o‘zim qutqarganman”, — deydi instabloger, aktrisa Maftuna Shokirova.

Bunyodbek Saidov kasal bo‘lishdan qo‘rqadi

“Men oxirgi paytlarda kasal bo‘lishdan qo‘rqaman”, — deydi xonanda.