“Толибон” таровиҳ намозига бормаганларни калтаклади
Афғонистоннинг Ҳирот вилоятида “Толибон” ҳаракати айрим аҳолини таровиҳ намозида қатнашмагани учун калтаклади. Бу ҳақда маҳаллий манбага таяниб, Hasht-e Subh Daily хабар берди.
Маълум қилинишича, калтакланганлар орасида бир қанча фармацевт, дўкондор ва маҳаллий аҳоли ҳам бор. “Толибон” ҳозирча бу ҳақда ҳеч қандай муносабат билдирмаган. Бунгача “Толибон” Мозори Шариф шаҳар кенгаши аъзоларидан рўзадорлар рўйхатини тайёрлаб, уларга топширишни сўраган.
Маълумот ўрнида, Афғонистонда “Толибон” ҳаракати рамазон ойи муносабати билан озиқ-овқат нархини пасайтиришни буюрганди. Буйруқ асосида олтита маҳсулотнинг нархи 18 дан 80 фоизгача арзонлашган.
19 март куни “Толибон”нинг эзгуликни тарғиб қилиш ва иллатларнинг олдини олиш бўлими Наврўз байрамини Севишганлар куни билан тенглаштирганди. “Толибон” мусулмонларда фақат иккита байрам: Рўза ҳайити (Ийд ал-Фитр) ва Қурбон ҳайити (Ийд ал-Адҳа) борлигини таъкидлаган. Шу билан бирга, “Толибон” хабарида Наврўз исломгача бўлган жаҳолатдан келиб чиққани айтилади.
