Бахмут учун жанг давом этмоқда: Украина армияси фронтдаги вазият ҳақида маълумот берди

Россия Донецк вилоятининг Бахмут ҳудудига ҳужум қилишда давом этмоқда, аммо тўқнашувлар сони сезиларли даражада камайган. Украина Қуролли кучларининг шарқий гуруҳи спикери Сергей Череватий бу ҳақда маълумот берди.

“Вазиятни яна таҳлил қилиш керак. Агар охирги икки кунни оладиган бўлсак, кеча (25 март) Бахмут фронтида 18 та ҳужум бўлган бўлса, бугун (26 март) уларнинг сони 17 тага етди. Бунгача 30 дан 50 гача ва ундан кўпроқ ҳужум қайд этилган”, —деди Череватий.

Украина Қуролли кучлари расмийси Россия кучлари ҳужуми камайгани ҳақида гапиришга ҳали эрта эканини қайд этди.

“Қарши томоннинг ҳаракатларини батафсил текшириш ва таҳлил қилиш талаб этилади. Эҳтимол, руслар шунчаки захирани ўзгартирмоқда. Россия армияси жами 268 та ўт очди, шаҳарнинг ўзи 94 марта ўққа тутилган ва 17 та тўқнашув қайд этилган. Уларнинг 13 таси Бахмутнинг туманида содир бўлган”, — дея таъкидлади у.

Таъкидланишича, Украина армияси ҳаммаси бўлиб Россия танки, жанговар десант ва пиёда транспорти, “Гвоздика ” ўзиюрар артиллерия мосламаси, кузатув-қўмондонлик пунктини ва ўқ-дорилар билан жиҳозланган 10 та жанговар омборни йўқ қилган.