Россия урушга ёлланувчиларга фронтда босиб ўтган ҳар бир километри учун 650 доллар таклиф қилмоқда

Россияда баҳорги урушга сафарбарлик кампанияси доирасида урушга ёлланувчиларга босиб ўтган ҳар бир километр учун 650 доллар мукофот таклиф қилинмоқда. Кремл бу сафарбарликнинг навбатдаги босқичидан қочишга ёрдам беради деб умид қилмоқда. Бу ҳақда The Telegraph хабар берди.

Ҳукумат веб-сайтлари, давлат идоралари, ташкилотлари, жумладан, кутубхоналар ва лицейларнинг ижтимоий тармоқларида урушга ёлланувчилар учун бир қатор имтиёзлар тақдим этувчи эълонлар пайдо бўлган. Улардан бири Ғарбий Ярославл вилоятидаги муниципал маъмурият томонидан эълон қилинган, хусусан, урушга рўйхатдан ўтиш учун тахминан 3 800 доллар миқдорида бир марталик бонус ваъда қилган.

Уларга Украинага урушга ёллангач ойига 2500 долларгача маош, қўшимча равишда “фаол ҳужумкор операцияларда қатнашгани учун” кунига тахминан 100 доллар ва “ҳар бир километр олдинга силжигани” учун 650 доллар ваъда қилинган.

“Кремл Украинадаги тўхтаб қолган уруши учун ёлланма аскарларга жуда муҳтож, аммо сафарбарликнинг навбатдаги тўлқинини олдини олишни хоҳлайди. Сентябрь ойида унинг қисман сафарбарлиги ўн минглаб эркакларнинг мамлакатни тарк этишига олиб келди”, — дейилади хабарда.

Бунинг ўрнига ҳукумат эркакларни кўнгиллиликка жалб қилишга умид қилмоқда. Хабарларга кўра, урушга ёлловчилар муносиб эркакларни рўйхатдан ўтишга чақиради, реклама тахталарига истиқболли имтиёзлар ўрнатилади, ҳарбий хизматга чақирув идоралари талабалар ҳамда ишсизларни жалб қилиш учун университетлар ва ижтимоий хизмат агентликлари билан ҳамкорлик қилмоқда.

Россия оммавий ахборот воситаларининг хабар беришича, бутун мамлакат бўйлаб эркаклар ҳарбий хизматга чақирув идораларидан чақирув хати олмоқда.  Москвадан 250 чақирим шимолда жойлашган Вологда шаҳрида чақирув қоғози олгач, ҳарбий хизматга келган эркаклар ҳудудни тарк этишни тақиқловчи ҳужжатларга имзо чекишга мажбур бўлгани хабар қилинган.

Эркакларга сафарбарликдан қочишга ёрдам берадиган гуруҳ — Go by the Forest’нинг айтишича, эркаклар томонидан чақирув қоғозлари ёки чақирилувчиларни кўриб чиқиш бўйича сўровлар сўнгги ойларда кунига ўнлаб кишидан 100 тагача кўпайган.