Тошкент вилоятининг Бўка тумани мурожаатчининг сарсон бўлишига сабабчи бўлган уч нафар мансабдор эгаллаб турган лавозимидан озод қилиниб, бир нафарига интизомий жазо қўлланилди. Бу ҳақда вилоят ҳокимлиги матбуот хизмати хабар берди.
Маълум бўлишича, биринчи гуруҳ ногирони бўлган фуқаронинг мурожаати эътиборсиз қолдирилган. “Деҳқон хўжаликлари ташкил этишни қўллаб-қувватлаш орқали аҳоли даромадларини ошириш бўйича қўшимча чора-тадбирлар тўғрисида”ги президент қарори талабларига риоя қилинмасдан, аукцион орқали олинган ер унга ўз вақтида ажратиб берилмасдан, сансоларликка йўл қўйилган.
Бўка тумани ҳокимлигининг умумий бўлими мудири ўзини вилоят ҳокимининг ёрдамчиси, деб таништирган ҳамда мурожаатчини ёлғон ваъдалар билан бир неча марта алдаб келган. Маҳаллада фаолият олиб бораётган ҳоким ёрдамчиси вазиятни юмшатиш, фуқарога ёрдам бериш ўрнига шу чоғгача алдаб келган. Шу тариқа аукционда ютиб олинган ерга баҳорги экин экиш, ерни тайёрлаш кечиккан.
Шу сабабли вилоят ҳокими вазият бўйича танқидий йиғилиш ўтказиб, уч нафар мансабдор эгаллаб турган лавозимидан озод қилган, яна бир нафар мансабдорга интизомий жазо қўлланилган.
Изоҳ (0)