“Ташаббусли бюджет” лойиҳасида Face ID ёрдамида идентификация қилиш механизми жорий этилмайди
Иқтисодиёт ва молия вазирлиги “Ташаббусли бюджет” лойиҳасида Face ID ёрдамида идентификация қилиш механизми жорий этилиши мумкинлигини маълум қилганди. Вазир Шерзод Кудбиев бу маълумотни рад этди.
Вазирлик хабарида айтилишича, йирик маҳаллалар аҳоли сони юқори бўлгани сабабли овоз беришда устунликка эга бўлиши мумкинлиги аниқланган. Овоз беришда тенгсизликка йўл қўймаслик, барча маҳаллалар учун лойиҳаларни амалга оширишда тенг имкониятлар яратиш мақсадида вазирлик томонидан бир қанча техник ва услубий ечимлар ишлаб чиқилмоқда.
Жумладан, Face ID ёрдамида идентификация қилиш механизмини жорий этиш. Бунда, тасдиқланган фойдаланувчилар томонидан берилган овозларни смс орқали берилган 5 ёки 10 овозга тенглаштириш, кам сонли аҳоли яшайдиган маҳаллалар аҳолиси томонидан илгари сурилган лойиҳалар учун кўпайтириш коэффициентини жорий этиш амалиёти кўриб чиқилади. Бунда кичик маҳаллалар лойиҳаларига катта маҳаллалар аҳолиси ташаббуси билан тенг шароитларда рақобатлашиш имконияти яратилиши кўзда тутилган.
Кейинчалик Иқтисодиёт ва молия вазири Шерзод Кудбиев “Ташаббусли бюджет” лойиҳасида Face ID ёрдамида идентификация қилиш механизми жорий этилмаслигини маълум қилди.
“Ҳеч қандай Face ID ва коэффициентни камайтирувчи ёки кўпайтирувчи имтиёзлар киритилиши кўзда тутилмаяпти. Буларнинг барчаси овоз бериш жараёнини сохталаштириш ёки кўпайтириб кўрсатишга қарши курашишга мўлжалланган вазирлик даражасидаги таклифлар эди. Ахборот хизмати ҳали хом бўлган лойиҳани эълон қилиб юборган”, — дейди вазир.
