Бухоро вилоятидаги бир қанча оилавий нодавлат мактабгача таълим ташкилотлари фаолияти вақтинча тўхтатилди. Бу ҳақда Мактабгача таълим агентлиги ахборот хизмати хабар берди.
Хабарга кўра, бутун республика бўйлаб босқичма-босқич Давлат-хусусий шериклиги асосидаги ҳамда оилавий нодавлат боғчаларнинг фаолияти ўрганилмоқда. Худди шундай ўрганишлардан бири Бухоро вилоятида ҳам ўтказилди. Ўрганиш натижаларига асосан Ғиждувон туманидаги якка тартибдаги тадбиркорлар Р.М, ЯТТ Ж.Ш, ЯТТ М.Д, Ромитан туманидаги ЯТТ Н.М, ЯТТ Ҳ.М.ларнинг фаолияти вақтинча тўхтатилди. Сабаблари:
- давлат боғчасида тарбияланаётган тарбияланувчиларни гўёки ЯТТ Р.М. ва ЯТТ Ж.Ш.лардаги оилавий нодавлат боғча тарбияланувчилари сифатида Нодавлат мактабгача таълим ташкилотларини бошқариш ахборот тизими орқали давоматдан ўтказилгани;
- давлат МТТда фаолият олиб бораётган ходим, худди шу ишлаётган давлат боғчасидаги тарбияланувчиларни ўзи очган ЯТТ М.Д.даги оилавий нодавлат боғчасидаги тарбияланувчилар ўрнига давоматдан ўтказгани;
- ЯТТ Ҳ.М.да фаолият юритаётган тарбиячи Ш.Д, ЯТТ Н.С.даги тарбияланувчиларнинг тасвирини юклаб, гўёки ЯТТ Ҳ.М.нинг тарбияланувчиси сифатида давомат қилгани аниқланган.
Қайд этилишича, улар давлат бюджетидан субсидияларни ноқонуний йўллар билан ўзлаштираётгани айтилган. Тадбиркорларнинг фаолиятига қонуний чора кўриш учун ҳуқуқ-тартибот органларига тўпланган ҳужжатлар юборилмоқда.
Изоҳ (0)