Украинадаги урушдан чиқиш йўлини топиш учун дунё Хитойнинг овозига қулоқ тутиши керак. Бу ҳақда Испания бош вазири Педро Санчес нутқига таяниб, Reuters хабар берди.
Испания вазири 24 март куни Пекинга давлат ташрифи арафасида ўтказилган матбуот анжуманида бу ҳақда гапирган.
“Хитой глобал ўйинчи, урушни биргаликда тўхтатиб, Украинанинг ҳудудий яхлитлигини тиклай оламизми ёки йўқлигини билиш учун Пекиннинг овозига қулоқ тутишимиз керак”, — деди Санчес Европа кенгаши йиғилишидан сўнг журналистларга.
Матбуот анжумани Санчеснинг Хитой раҳбари Си Цзиньпин билан 31 мартга белгиланган учрашувга тайёргарлик кўриш арафасида бўлиб ўтди.
Икки лидернинг дипломатик муносабатларнинг 50 йиллиги муносабати билан ўтказиладиган учрашувида Хитой Украинада давом этаётган можарога эътибор қаратилиши ва ўт очишни тўхтатишга чақирувчи 12 банддан иборат тинчлик режасини илгари суриши кутилмоқда.
Ўз навбатида, Испания бош вазири Украина президенти Владимир Зеленскийнинг 2014 йилда Қрим Россия томонидан аннексия қилинишидан олдинги Украина ҳудудидаги статус-квони тиклаш талабларини ўз ичига олган тинчлик таклифини қўллаб-қувватлаган.
Маълумот учун, Хитой февраль ойида Украинадаги урушни тугатиш бўйича 12 банддан иборат тинчлик режасини эълон қилган. У қуйидаги бандларни ўз ичига олади:
- Барча мамлакатларнинг суверенитетини ҳурмат қилиш;
- Совуқ уруш менталитетидан воз кечиш;
- Ўт очишни тўхтатиш;
- Тинчлик музокараларини бошлаш;
- Гуманитар инқирозни ҳал қилиш;
- Тинч аҳоли ва ҳарбий асирларни ҳимоя қилиш;
- Атом электр станцияларининг хавфсизлигини таъминлаш;
- Стратегик хавфларни камайтириш;
- Бир томонлама санкцияларни тугатиш;
- Ғалла экспортини кафолатлаш;
- Ишлаб чиқариш ва таъминот занжирларининг барқарорлигини таъминлаш;
- Урушдан кейинги тикланишга ҳисса қўшиш.
Изоҳ (0)