Туркияда эркак ўзи билан бирга яшаган ўзбекистонлик аёлни тош билан ўлдириб, жасадини бўлаклаб, музлаткичда сақлагани аниқланди (видео)

Истанбулнинг Бахчелиэвлер туманида 40 ёшли ўзбекистонлик аёлни тош билан ўлдириб, жасадини майдалаб, музлаткичга қўйган 60 ёшли эркак қўлга олинди. Бу ҳақда Hurriyet хабар берди.

Маълум қилинишича, қотилликда айбланган эркак қилган ишидан афсусланмаган. 

“Кошки бу ишни Рамазон ойида қилмасайдим, гуноҳ бўлди. Мен бундан афсусланмайман. Хоҳлаганимни қилдим, ҳужумни режалаштирмаганман”, — деган у.

Воқеа 23 март куни маҳаллий вақт билан эрталаб соат 05:30 да юз берган. Қотилликда айбланган эркак узоқ вақт бирга яшаган ўзбекистонлик аёлдан 17 минг лира (891 доллар) қарз олганини айтган. Улар ўртасида кредит бўйича қарздорлик ва олдинги қарзлар бўйича келишмовчилик юзага келган. Ўзаро жанжалдан кейин эркак Ўзбекистон фуқаросини тош билан ўлдириб, жасадини бўлаклаб ташлаган. У аёлнинг кесилган бўлакларини чиқиндига мўлжалланган қопларга солиб, музлаткичга қўйган.

Уйдан жанжал овозларини эшитган қўшнилар полицияга хабар берган. Огоҳлантириш бўйича уйга келган полиция гуруҳлари ўлдирилган аёл жасадини музлаткичдан топиб, гумондорни қўлга олган.

“Эркак қўлга тушмаслик учун жасадни қисмларга ажратиб, вақти-вақти билан ахлатга ташлашни режалаштирган”, — дейилади хабарда.

Воқеа юзасидан олиб борилган тергов ишлари доирасида янги маълумотлар пайдо бўлди. Унга кўра, гумонланувчи билан марҳума ўртасида анча вақтдан бери келишмовчилик бўлган, эркак шу сабабдан аёлни ўлдиришни режалаштирган. Хусусан, қотилликда айбланувчи бунинг учун уйига тош олиб киргани маълум бўлди. 

Маълум бўлишича, гумонланувчи полиция бўлимида содир этган жиноятига иқрор бўлган.

“У ётган пайти бошига тош билан 5 марта урдим. У менга сени яхши кўраман, илтимос, бундай қилма, деди. Кейин уни бўғдим, унинг овози ҳамон эшитиларди. Уни ўлдиришга кўп ҳаракат қилдим, эҳтимол бир соат. Ҳамма жой қонга бўялганди. Кейин қўлларини кесиб олдим. Ниятим уларни бутунлай кесиб, ҳидланмаслиги учун музлаткичга қўйиш эди. Ҳаракат қилдим, лекин кесолмагач, бориб арра сотиб олдим. Эртаси куни картадан пул ечдим, банк қарзини тўладим. Кошки уни Рамазон ойида ўлдирмасайдим, гуноҳ бўлди. Бундан афсусланмайман. Хоҳлаганимни қилдим. Мен буни режалаштирмаганман”, — деган у.

Эркак даҳшатли ҳис-туйғулар ёки қийноқлар ёрдамида қасддан қотилликда айбланиб, ҳибсга олинган.