Молдова президенти Майя Санду бундан буён барча қонун ҳужжатларида давлат тилини молдован эмас, румин тили деб аташ тўғрисидаги қонунни имзолади. Бу ҳақда Сандунинг Facebook’даги саҳифасида хабар берилди.
“Румин тили бу ерда яшовчи ва шу заминни севадиган барчани бирлаштиришини истайман. Дунё бўйлаб 27 миллиондан ортиқ одам билан биргаликда биз ҳам Европа Иттифоқининг расмий тилларидан бири бўлган румин тилида гаплашамиз”, — деди Санду.
Молдова президенти, шунингдек, мамлакат аҳолиси румин тилида эмас, молдован тилида гаплашади, деганларнинг “мақсади битта — бизни ажратиш” деган фикрни билдирди.
Молдова парламенти 16 март куни молдован тилини румин тилига ўзгартириш тўғрисидаги қонунни қабул қилди. Президентнинг “Ҳаракат ва бирдамлик” партияси депутатлари қонунни ёқлаб чиқди, коммунистлар ва социалистлар фракцияси эса бунга қарши чиқди.
Қонун Молдова Конституциявий судининг 2013 йилда конституциядаги “молдован тили” тушунчасини “румин тили” билан алмаштириш ҳақида чиқарган қарорини бажариш мақсадида қабул қилинган.
Молдован ва румин тиллари роман тилларининг Болқон-роман кичик гуруҳига киради ва улар ўзаро боғлиқ. Баъзи тилшунослар “молдован” ва “румин” тилларини бир тилнинг турли номлари деб ҳисобласа, бошқа қисми молдован тилини мустақил Шарқий роман тили деб атайди.
Изоҳ (0)