Помпео Россия ва Хитой яқинлашувини Байденнинг “стратегик хатоси” деб атади
АҚШ президенти Жо Байден маъмурияти Россия ва Хитойнинг яқинлашишига имкон бериб, стратегик хатога йўл қўйди. Бу ҳақда Марказий разведка бошқармасининг собиқ раҳбари ва АҚШ собиқ давлат котиби Майк Помпео Fox News’га берган интервьюсида гапирди.
Сиёсатчи Оқ уйнинг ХХР раиси Си Цзиньпиннинг Москвага ташрифини аҳамиятсиз ҳодиса сифатида кўрсатишга уринишларини “катта стратегик хато” деб баҳолади.
“Байден маъмурияти муваффақиятсизликка учради, улар россияликлар ва хитойликларнинг бирлашишига рухсат берди, бу эса АҚШ ва ҳар бир фуқаро учун катта хавф туғдиради”, — деди Помпео.
Бирлашган Миллатлар Ташкилоти Хавфсизлик Кенгашининг икки доимий аъзоси “АҚШга қарши бирлашгани” Вашингтон учун салбий оқибатларга олиб келади, дея хулоса қилди Помпео.
Си Цзиньпин 20 март куни расмий ташриф билан Москвага келди. Сиёсатчи Россия бош вазири Михаил Мишустин билан музокаралар олиб борди ва давлат раҳбари Владимир Путин билан икки марта учрашди. Сиёсатчилар Украинадаги можарони тартибга солишни, 2024 йилда Россияда бўлиб ўтадиган президентлик сайловларини муҳокама қилиб, “Сибир қудрати-2” газ қувурини қуриш бўйича келишувнинг асосий параметрларини келишиб олди. Музокаралар якунида Путин ва Си Цзиньпин 2030 йилгача иқтисодий ҳамкорликнинг асосий йўналишларини ривожлантириш режасини имзолади.
