Россияда “тил рейтинги” паст бўлган муҳожирларни жаримага тортиш таклиф қилинди
Россия Ички ишлар вазирлиги мамлакатда яшовчи “тил рейтинги” паст бўлган муҳожирларга жарималар жорий этишни таклиф қилмоқда, деб хабар беради “Коммерсант”.
Қайд этилишича, жарима миқдори мамлакатга келган муҳожирларнинг рус тилини билишига боғлиқ бўлади. Бундан ташқари, ИИВ рус тилини яхши билган муҳожирларга солиқ имтиёзларини бериш таклифини ҳам илгари сурмоқда.
“Тил рейтингини жорий этишнинг самарали таъсири мослашиш давридан, масалан, идентификация картасини олгандан кейинги 1-3 ойда бошланиши керак. Рейтинг паст бўлган тақдирда — рағбат — мослашиш тўлови”, — дейди Россия ИИВ Миграция масалалари бўйича бош бошқармаси бошлиғи Валентина Казакова.
Казакованинг аниқлик киритишича, идора фуқаронинг тилни ўрганишини баҳолаш бўйича балли тизим — “тил рейтинги”ни жорий этишни таклиф этмоқда. У чет эл фуқароси ҳақидаги фактик маълумотларни баҳолаш алгоритми асосида ҳисоблаб чиқилади. Шундан сўнг муҳожирлар рус тилини билиш даражасига кўра бир неча тоифаларга бўлинади.
ИИВ масъулига кўра, рус тилини яхши билган муҳожирга даромад солиғи бўйича имтиёз тақдим этиш мумкин бўлади. Вазирликка кўра, бундай чегирмали имтиёз 50 фоизга етади.
Бунда чегирма миқдори фарқланган характерга эга бўлади. Рус тилини базавий билганларга 10 фоиз, ўрта даражага — 15 фоиз, юқори даража — 20 фоиз, рус тили ташувчиси бўлган муҳожирларга эса 50 фоизли солиқ чегирмаси берилади.
Март ўрталарида Россия фирмалари Марказий Осиёдан келган юзлаб муҳожирларни босиб олинган Украина ҳудудларига ишлаш учун ёллагани маълум бўлганди. Муҳожирлар рус аскарларининг жасадларини йиғиш, хандақлар қазиш ва жанговар ҳаракатлар натижасида вайрон бўлган биноларни таъмирлаш билан шуғулланиши айтилган эди.
