АҚШда эркак ўзи ва оиласини суюқ азотда музлатиб қўйишга қарор қилди
АҚШнинг Мичиган штатидаги Крионика институти раҳбари, 54 ёшли Дэннис Ковалски қонуний равишда ўлик деб эълон қилганидан сўнг ўзини ва яқинларини музлатиб қўйишга қарор қилди. У келажакда уйғонишларига умид қилмоқда. Бу ҳақда Business Insider хабар берди.
Америкалик эркак крионика ҳақида биринчи марта 1970 йил болалигида телевизор дастуридан эшитган. Шу пайтдан бошлаб у бу илмнинг инсон умрини узайтиришини исботлашни орзу қилган. Крионика — одамни расман ўлганидан кейин уни жуда паст ҳароратларда сақлаб қолиш амалиёти бўлиб, келажакда уни “қайта тирилтириш” умидида суюқ азотга ботирилади.
Ковалскининг сўзларига кўра, бундан юз йил олдин технология ривожланмагани сабабли ўлимнинг олдини олиш қийин эди. Юрак тўхташи билан одам вафот этган. Бироқ вақт ўтиши билан юрак-ўпка реанимацияси ёки дефибрилляция ёрдамида унинг ишини давом эттириш мумкинлиги маълум бўлган.
“Ўлимдан кейин танангизни сақлаб қолиш билан сиз ҳеч нарса йўқотмайсиз, лекин назарий жиҳатдан ҳамма нарсага эришишингиз мумкин”, — дейди у.
10 йилдан кўпроқ вақт олдин эркак Крионика институти президенти этиб тайинланган. Ўшандан бери у бутун вақтини шу фанга бағишлайди. Ковалскининг рафиқаси ва уч фарзанди ҳам ўлим факти қонуний асосда аниқлангач, жасадларини музлатишга қарор қилган. Уларнинг ҳар бири Крионика институтига мурожаат қилиб, процедура ва сақлаш учун 28 минг доллар тўлашга ваъда берган.
Эркакнинг таъкидлашича, унинг танасини музлатиш истаги ўлим қўрқуви билан боғлиқ эмас. Аксинча, бу ҳаётга бўлган муҳаббатнинг намоён бўлиши ва кичик, аммо 20, 50 ёки 100 йилдан кейин дунё қандай ўзгаришини кўришдан иборат.
