Украина разведкаси Россия яна неча йил уруш олиб боришини прогноз қилди
Россия Украинага қарши урушни давом эттириш учун ҳали ҳам иқтисодий ва ҳарбий ресурсларга эга. Москва 2024 йилда ҳам Украина билан уруш олиб бориши мумкин. Бу ҳақда Украина Мудофаа вазирлиги разведка бошқармаси бошлиғи ўринбосари Вадим Скибицкий “РБК-Украина”га маълум қилди.
“Улар 2023 йил давомида уруш олиб бориши, бу узоғи 2024 йилда ҳам давом этиши мумкин. Агар гап одатий уруш ҳақида кетаётган бўлса. Агар санкциялар кучайтирилса, унда урушнинг кечиши қисқаради”, — деди у.
Скибицкий Россия қўшинлари ҳужумга тайёргарлик кўраётгани, хусусан, улар разведка амалиёти ўтказаётгани ва Украина Қуролли кучлари мудофаасидаги заиф томонларни аниқлашга ҳаракат қилаётганини айтди.
“Бироқ Россия бир вақтнинг ўзида 2-3 йўналишда катта стратегик ҳужумни амалга оширишга қодир эмас. Айни пайтда Херсон, Запороже вилоятлари ва Қримда Россия қўшинлари мудофаага тайёрланмоқда. Айни дамда русларнинг асосий вазифаси Донецк ва Луганск вилоятлари маъмурий чегараларига етиб бориш”, — деди Скибицкий.
Шунингдек, у рус қўшинлари ҳужумни кучайтиргани ҳақидаги гаплар Россиянинг ташвиқоти эканини айтди. Разведка расмийси Россия армиясида унчалик кўп кучлар қолмагани, Беларусдан ҳужум қилиш хавфини унутиб туриш мумкинлигини таъкидлади.
Ўз навбатида, Александр Сирский Украина қўшинлари Бахмут йўналишида ҳужумга ўтмоқчи эканини айтди. Россия Қуролли кучлари кучсизлана бошлагани ва Украина жангчилари эса тез орада ҳаракат қила бошлашини билдирди.
