Беларусь мухолифати етакчиси Светлана Тихановская Вашингтонга ташрифи чоғида Беларусни Россия билан алоқаларни узишга чақирди. У 22 март куни АҚШ Конгрессида сўзга чиқиб, Кремлга Украинага ҳужум учун Беларусдан фойдаланишга рухсат берган Александр Лукашенконинг ҳаракатларини танқид қилди.
“Тажовузкор мамлакат “Украинага ҳужум қилиш ва унга таҳдид солиш” учун Беларусь ҳудуди, ҳаво ҳудуди ва инфратузилмасидан ҳарбий мақсадларда “эркин фойдаланади”, деди Тихановская. “Россиянинг Беларусь ички ишларига аралашувига қарши туриш вақти келди. Россия ноқонуний режимни қўллаб-қувватлаб, миллий ўзлигимизга қарши мустамлакачилик ҳаракатларини амалга оширмоқда”, — деди у. Беларусь президентлигига собиқ номзод Тихановская мамлакатни Украинага қарши урушда қатнашишни тўхтатишга чақирди.
Тихановская Беларусда 15 йилга озодликдан маҳрум қилинган
Март ойи бошида Минск шаҳар суди Тихановскаяни сиртдан 15 йиллик қамоқ жазосига ҳукм қилди. Тергов унга бир вақтнинг ўзида ўнта айблов қўйди: унвон ва ҳокимиятни рухсатсиз тортиб олиш, миллий хавфсизликка қарши ҳаракатларда хорижий давлатга ёрдам бериш, ҳокимиятни эгаллаб олиш учун фитна уюштириш, нафрат уйғотиш, экстремистик тузилма яратиш, Марказий сайлов комиссияси ишига тўсқинлик қилиш ва бошқалар.
Тихановскаянинг сўзларига кўра, у Беларусь ҳукумати бу ҳукм билан унга нима демоқчи бўлгани ҳақида бош қотираётгани йўқ. У “ҳукм билан ёки усиз сиёсий маҳбусларни озод қилиш ва мамлакатни демократик ўзгаришлар сари етаклаш учун барча имкониятларни ишга солишда” давом этмоқчи.
Изоҳ (0)