КХДР 13 мартдан бошлаб кетма-кет тўрт кун қитъалараро баллистик ракеталарни учиргани тўғрисида хабар берилганди. “Катта еттилик” мамлакатлари Ташқи ишлар вазирликлари ва Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел Шимолий Кореянинг ушбу ҳаракатини қоралади.
Европа ташқи сиёсат хизмати томонидан эълон қилинган баёнотда қайд этилишича, Пхеньян нинг бу каби ҳаракатлари “минтақавий ва халқаро тинчлик ҳамда хавфсизликка путур етказмоқда”.
Бундан ташқари, G7 ва Европа Иттифоқи давлатлари ҳам БМТ Хавфсизлик кенгашининг янги ракеталар учирилишига бирор чора кўрмаётганини қоралаган. Ҳужжат муаллифларининг таъкидлашича, ушбу органнинг алоҳида аъзолари зарур чораларни кўришга тўсқинлик қилган, шу билан бирга улар аниқ мамлакатлар номини келтирмаган.
Шунингдек, баёнотда Шимолий Корея баллистик ракета учирганининг рекорд сонига, Пхеньян нинг ядровий қуролдан фойдаланиш эҳтимоли бўйича “масъулиятсиз ва беқарорлаштирувчи риторика”сига ишора қилинган. Унинг муаллифлари КХДРдан ядро қуролидан, ядровий дастурлардан, оммавий қирғин қуроллари ва баллистик ракеталарни яратиш бўйича ҳар қандай бошқа дастурлардан воз кечиш, шунингдек, БМТ Хавфсизлик кенгашининг тегишли резолюцияларидан келиб чиқадиган мажбуриятларни тўлиқ бажариш талабини яна бир бор таъкидлаган.
Жанубий Корея Қуролли кучлари маълумотларига кўра, 19 март куни эрталаб КХДР Пхеньян провинцияси шимолидаги ҳудуддан Япон денгизи томон қисқа масофали баллистик ракетани учирган. Ўз навбатида Япония Мудофаа вазирлиги Шимолий Корея ракетаси 50 километр баландликка кўтарилгани ва 800 километр масофани босиб ўтганини билдирган. Шундан сўнг объект денгизга қулаган.
Изоҳ (0)