KXDR 13-martdan boshlab ketma-ket to‘rt kun qit’alararo ballistik raketalarni uchirgani to‘g‘risida xabar berilgandi. “Katta yettilik” mamlakatlari Tashqi ishlar vazirliklari va Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel Shimoliy Koreyaning ushbu harakatini qoraladi.
Yevropa tashqi siyosat xizmati tomonidan e’lon qilingan bayonotda qayd etilishicha, Pxenyanning bu kabi harakatlari “mintaqaviy va xalqaro tinchlik hamda xavfsizlikka putur yetkazmoqda”.
Bundan tashqari, G7 va Yevropa Ittifoqi davlatlari ham BMT Xavfsizlik kengashining yangi raketalar uchirilishiga biror chora ko‘rmayotganini qoralagan. Hujjat mualliflarining ta’kidlashicha, ushbu organning alohida a’zolari zarur choralarni ko‘rishga to‘sqinlik qilgan, shu bilan birga ular aniq mamlakatlar nomini keltirmagan.
Shuningdek, bayonotda Shimoliy Koreya ballistik raketa uchirganining rekord soniga, Pxenyanning yadroviy quroldan foydalanish ehtimoli bo‘yicha “mas’uliyatsiz va beqarorlashtiruvchi ritorika”siga ishora qilingan. Uning mualliflari KXDRdan yadro qurolidan, yadroviy dasturlardan, ommaviy qirg‘in qurollari va ballistik raketalarni yaratish bo‘yicha har qanday boshqa dasturlardan voz kechish, shuningdek, BMT Xavfsizlik kengashining tegishli rezolyutsiyalaridan kelib chiqadigan majburiyatlarni to‘liq bajarish talabini yana bir bor ta’kidlagan.
Janubiy Koreya Qurolli kuchlari ma’lumotlariga ko‘ra, 19 mart kuni ertalab KXDR Pxenyan provinsiyasi shimolidagi hududdan Yapon dengizi tomon qisqa masofali ballistik raketani uchirgan. O‘z navbatida Yaponiya Mudofaa vazirligi Shimoliy Koreya raketasi 50 kilometr balandlikka ko‘tarilgani va 800 kilometr masofani bosib o‘tganini bildirgan. Shundan so‘ng, obyekt dengizga qulagan.
Izoh (0)