Гаагадаги Халқаро жиноий суднинг Россия президенти Владимир Путинни ҳибсга олишга ордер бериш ҳақидаги қарори асосли, деди АҚШ президенти Жо Байден.
Байден Путинни ҳарбий жиноятларга алоқадор, деб ҳисобламоқда. “Аммо масала шундаки, бу (ХЖС) биз томондан халқаро миқёсда тан олинмайди. Лекин фикримча, у (ХЖС) жуда қаттиқ позиция билан чиқди”, — деди Оқ уй раҳбари.
Associated Press манбаларининг айтишича, Қўшма Штатлар суд қарори Украинадаги урушга нисбатан бетараф бўлган мамлакатлар позицияларига таъсир кўрсатишига умид қилмоқда. Улар орасида Хитой ҳам бор — Пекиннинг урушни тугатиш бўйича “тинчлик режаси”га аксарият мамлакатлар томонида танқидий қаралмоқда.
Халқаро Гаага суди 17 март куни Россия президенти Владимир Путинни ҳибсга олишга ордер берди. Россия президенти Украинанинг босиб олинган ҳудудларидан болаларни Россияга ноқонуний равишда депортация қилганликда гумонланмоқда. Шунингдек, суд Россиянинг болалар ҳуқуқлари бўйича комиссари Мария Львова-Беловани ҳам ҳибсга олиш учун ордер берган.
Путиннинг матбуот котиби Дмитрий Песков ордер бериш ҳақидаги “муаммонинг кўтарилиши”ни “номақбул” деб атади ва Россия суднинг юрисдикциясини тан олмаслигини, бу эса суднинг қарорлари ҳақиқий эмаслигини билдиришини таъкидлади. Львова-Белованинг айтишича, халқаро ҳамжамият унинг болаларни уруш зонасидан олиб чиқишдаги фаолиятини шу тариқа “юқори” баҳолаган. У “ўз ишида давом этишини” қўшимча қилди.
ХЖС Бирлашган Миллатлар Ташкилоти органи эмас, унинг таъсис ҳужжати — 1998 йилги “Рим статути”дир. Ҳужжатни ишлаб чиқишда Россия ҳам иштирок этган, мамлакат уни 2000 йилда имзолаган. Статут 2003 йилда кучга кирди. Бироқ 2016 йилда Москва келишувдан чиқишга қарор қилди. Бунгача суд Қримнинг Россия таркибига киришини Москва ва Киев ўртасидаги “халқаро қуролли можарога тенг” деб атаганди.
Украина ҳам “Рим статути”ни имзолаган, лекин уни ратификация қилмаган. Бироқ мамлакат 2015 йилда “Россиянинг ҳарбий агрессияси бошланганидан бери Украина ҳудудида содир этилган барча жиноятларга нисбатан” суднинг юрисдикциясини тан олди. Ҳужжатни жами 123 давлат, жумладан, Хитой, Туркия, Ҳиндистон ва АҚШ ратификация қилган. Қўшма Штатлар судни тузиш бўйича мунозараларда иштирок этган, аммо 1998 йилда “Рим статути”ни қўллаб-қувватламаган.
Изоҳ (0)