Чеченистон раҳбари Рамзан Қодиров бедаво дардга чалингани ҳақидаги хабарларга муносабат билдирди. Сиёсатчи ўзининг Telegram саҳифасига видеомуносабатини жойлади.
Қодиров киноя билан касаллиги ҳақидаги маълумотларнинг тўғрилигига умид қилганларни хафа қилганидан афсусдалигини айтди. У аввалгидек спорт билан шуғулланиши, тоғларга чиқиши, Чеченистонни ривожлантиришдаги муҳим масалаларни муҳокама қилиш билан шуғулланаётганини таъкидлади. Бундан ташқари, у қўлида тиббий асбоб эмас, балки электрон тасбеҳ борлигини тушунтирди.
Шунингдек, Рамзан Қодиров айримлар унинг кўриш қобилиятига қизиқишини айтиб, 100 фоиз равшан кўришини қайд этди. Сиёсатчи Россия армияси Украинага қарши урушда ғалаба қозонишини ҳам қўшимча қилди.
Мазкур муносабатгача Германиянинг Билд нашри Рамзан Қодировнинг буйрагида муаммо борлиги, танасидаги шишлар эса бунинг аломати эканини хабар қилган. Февраль ойида Чеченистон раҳбари Россия президентининг Федерал Мажлисга мурожаатини буйраги касаллиги сабабли ўтказиб юборгани ҳақида маълумотлар пайдо бўлган. Бундан ташқари Чеченистон раҳбари даволаниш учун Германияга кетган, уни Россия федерал хавфсизлик хизмати заҳарлагани илгари сурилган. Европа Қодировнинг самолётига Германияга бориши учун ҳаво ҳудудидан парвоз қилишига рухсат бергани айтилган.
Изоҳ (0)