Россиянинг Қора денгиз узра парвоз қилаётган Су-27 самолёти халқаро ҳаво ҳудудидаги АҚШнинг МQ-9 Reaper дронини уриб туширди. Россия Мудофаа вазирлиги дрон уриб туширилганини тасдиқлаб, баёнот берди.
Баёнотга кўра, 14 март куни эрталаб Россия Аэрокосмик кучларининг ҳаво ҳудудини назорат қилиш бўлими Америка МQ-9 дронининг Россия давлат чегараси йўналиши бўйича парвозини қайд этган. Дрон парвози транспондерлар ўчирилган ҳолда, махсус ҳарбий операция ўтказиш мақсадида белгиланган ҳаво ҳудудидан фойдаланишнинг вақтинчалик режимини бузган ҳолда амалга оширилган.
“Қоидабузарни аниқлаш мақсадида ҳаво ҳужумидан мудофаа кучларининг навбатчи қирувчилари ҳавога кўтарилди. Кескин манёврлар натижасида Москва вақти билан соат 09:30 да МQ-9 дрони баландликни йўқотган ҳолда назоратсиз парвозга ўтди ва сув юзасида тўқнашди. Россия қирувчилари ҳаво-десант қуролларидан фойдаланмади, дрон билан алоқа қилмади ва ўз аэродромига қайтди”, — дейилган баёнотда.
Аввалроқ АҚШ Ҳарбий-ҳаво кучларининг Европа қўмондонлиги 14 март куни Россиянинг Су-27 самолёти Қора денгиздаги халқаро ҳаво ҳудудида “эҳтиётсизлик ва нопрофессионаллик” туфайли АҚШ дронини уриб туширганини маълум қилганди. Оқ уй АҚШ президенти Жо Байден воқеа юзасидан хабардор қилинганини билдирган. Давлат департаменти бу борада Россия билан музокара олиб бормоқчи. Ўз навбатида, АҚШ Россиянинг Вашингтондаги элчисини Қора денгиздаги дрон билан боғлиқ ҳодиса туфайли Давлат департаментига чақирган.
Изоҳ (0)